Vairengte atanga Sairang four lane siam turah contractor-in rokhawlhna avanga a huna hna a tan theih loh avangin, a hmanrua chhawp thlawn man cheng nuai 7000 chuang chawi turin Mizoram sawrkar a phut.
Mizoram Business Coordination Committee chuan, four lane laih turah hian engemaw rokhawlhna avangin hna a tan mai theih loh a, contractor hian hna thawk turin hmanrua an inchhawp tawh a, hnathawhna tur hmanraw dah mai mai man cheng nuai 7200 chawi turin a ti niin a sawi.
‘He four lane hi siam a nih chuan, Zofaten engkim man tlawm zawkin kan nei thei dawn a. Zoram mipuiin nghakhlel taka kan thlir, Vairengte to Sairang four lane kawngpui siam theih loha a awm leh contractor pawhin a lo thlawna cheng nuai 7200 sawrkar hnena a phut te, inhnuhdawh mai an duh tih thawm hriatte hi pawi kan ti a, thuneituten chingfel thuai turin kan ngen a ni,’ a ti.
Tunlaiin Mizoramah dan loa sumdawng hnamdang an tam leh hle tih MBCC chuan hria in, Mizo hming hawha hnamdang dawr leh Mizo hminga hnamdang motor register awm zawng zawngin dan anga hrem an nih theih nan hma lak a tum tih a sawi. ‘Dawr siam nan leh motor register nana Mizo hming hman tir zawng zawngte a rang thei ang bera Mizo hming an hmantir chu titawp nghal turin kan ngen a. Hetianga Mizo hming hmanga hnamdang dawr leh motor register titawp lote chungah action lak a awm chuan mahni hnam hralha mahni hming hnamdang hman tirtute mawh a ni ang tih hre urin kan chah a ni,’ a ti.
Mizorama sumdawngten Income Tax department atangin income tax pe tura tihna lehkha leh a dang dawng engemawzat an awm a, hemi chungchangah hian Income Tax department-a thawktute leh dan hremite nen zau zawk zirchianna buatsaih tura hma lak mek a ni a, hetiang lama harsatna nei chuan MBCC hruaitute hrilh hre thuai thin turin an ngen tih a sawi bawk.
Four lane sialtu tur contractor-in nuai 7000+ chawi turin sawrkar ti
