France-in Palestinian-te ram a pawm veleh ta

France-in Palestinian-te ram a pawm veleh ta
France chuan Palestinian-te tan ram a awm a pawm ve ta a, a pawm ve ta ram thar ber a ni.
New York-a UN thutkhawmah President Emmanuel Macron-a chuan ‘muanna awm hun a lo thleng’ tia sawiin ‘Gaza-a indona chuan engmah a thlen lo’ tih a sawi.
US President Donald Trump-a pawhin Thawhlehni (India-a Nilaini tuk)-ah UN General Assembly-ah thu a sawi ve bawk a, Jordan leh Qatar hruaitute pawhin an sawi.
Thawhtannia France leh Saudi Arabia ramten an thlen ram pahnih siamna tur sawihova ni khat intawh khawmah US a tel lo va, G7 ram zingah Germany leh Italy an tel lo bawk.
Belgium, Luxembourg, Malta, Andorra leh San Marino ramte pawhin Palestinian ram pawm hi an tum ve mek bawk a. A hmain UK, Canada, Australia leh Portugal chuan Pathianni khan an lo pawm tawh.
Gaza-a Israeli sipai chetna avanga mihring dinhmun chhiatna nasa tak awm leh West Bank-a ram an luah nasat chuan ram dangte atangin nawrna na tak a siam mek.
Israel chuan Palestine ram pawm chu October 7, 2023-a an ram beia mi 1,200 chuang an thah leh hren tura mi 251 hruaitu, Hamas tana hamthatna niin an sawi.
Israel-in Gaza a beih chinah Palestinian 65,000 chuang an thi tawh a. Israeli sipaite hian mi maktaduai chuang chenna Gaza City lak tuma bei mekin thla hmasa khan tam a tla tih puan a ni.
French hruaitu chuan indo a tawp leh Hamas-in Israeli an hrente chhuah hun a ni tih a sawi.
Middle East-a indona titawp tur hian ram tam takin hma la mah se a la hlawhtling thei lo va, ‘ram pahnih siama chin fel a nih theih nan kan theihtawp kan chhuah ang’ tih a sawi a. “Israel leh Palestine ram awmin muanna leh himna a awm ang,” a ti.
Saudi Arabian Foreign Minister Faisal bin Farhan Al Saud pawhin UN-ah hian Crown Prince Mohammed bin Salman aiawhin thu a sawi bawk a. Ram pahnih dintir chu muanna tluantling awm theihna tur awm chhun niin a sawi.
European Commission President Ursula von der Leyen-i pawhin EU chuan Gaza tun din a nih leh theihna tura sum ngai ruahmanna thar a siam dawn tih a sawi ve bawk.
“A tul ang kan ti zel dawn,” tiin UN General Assembly-ah a sawi a. “Hei hi Palestine Donor Group kan siam chhan a ni,” a ti.
UN-a Israel palai, Danny Dannon-a chuan Macron-a’n a puan hnu lawkah thuthar lakhawmtute a kawm a. October 7-a beihna an tawh hnuah khan ram pahniha insiam tumna kha chu a tawp tawh tih a sawi.
Prime Minister Benjamin Netanyahu-a pawhin Jordan lui thlang lam chinah Palestinian-te ram a awm dawn lo tih a sawi a, President Isaac Herzog-a pawhin ‘thimna a tizual dawn’ tih a sawi bawk.
Macron-a’n a pawm tih a puan hma hian Palestinian leh Israeli flag-te chu Pathianni zan khan Eiffel Tower-ah zar a ni a. Thawhtanni khan town hall tam takah Palestinian flag zar a ni bawk.