France police te chuan lungawilo pungkhawm sang tam tak te hnawh darh nan tear gas a hmang zui zel a. Sainte-Soline ah mipui sang tam tak te chuan water resevoir thar siam tumna duhlovin lungawilohna an lantir a ni.
Construction tihna hmunah buaina chuakin police car thahnem tak tihchhiatin a awm a. Paris leh khawepui lian dangqa karkhat chuang President Emmanuel Macron a pension reform duhlohna lantir a nih hnuah lungawilohna thar lian tham taka kalpui a ni zui ta a ni.
Tuna lungawilohna erawh sorkar in pension kum a tihsan nena inkaihhnawihna nei miah lo a ni chungin France mipuite phunna leh lungawilohna ti irhchhuak belhtu anga ngaih a ni thung a.
Sainte-Saline, Poitiers bul lawkah irrgation project kalpui chu duhlohna nasa taka lantir a ni a. Mi 25,000 vel an pungkhawm nia sawi a ni.
Tuna lungawilohna hi Deux-Sevres department tena tui dahkhawlna siam an tum vang a ni a, he tui dahkhawlna hi loneitu 400 vel te hlawkna tur liau liau ani a, thal laia an tui hman tur siamsak tumna ber a ni.
France hian tun hnaiah khawkheng tuar rengin hei vang hian tui avang thin hle a. Arificial reservoir thlawptute chuan khawro lutuk hunah reservoir chuan a chhawk dawn an ti a.
Mahse a duh lote chua project kalpui tum chu agricultural producer lian te thlai enkawlna mai mai tur tiin local community te tan chhawrna tur a awm lo an ti ve thung.
“Ram pumin pension kum bithliah an buaipui laiin keini chuan kan tui te venhim tumin hma kan la ve thung a ni” tiin organiser te chuan an sawi a, “No reservoirs, thank you” tih banner an tar bawk.
Sainte-Soline ah hian police officer 3,000 chuang tirhluh niin officials te chuan tharum thawh mai duh pungkhawm zingah 1,000 vel an awm an ti thung a. Pungkhawm te hnawhdarh nan hian police te chuan tear gas hial an hmang bawk a.
Mi thahnem tak man niin an mi man te atangin ralthuam chi hrang hrang tharumthawhnaa hman tum te a tle tiin police te chuan an sawi bawk.
President Macron chuan, “He tharumthawhna kalpui lakah hian kan tlawm dawn lo. Democracy ramah tharumthawh turin dikna kan nei lo” tiin a sawi.
Interior Minister Gerald Darmanin chuan Sainte-Soline ah police officer te kutthlaka an awm chu sawi ngaihna awm lo tiin a sawi a.
Deux-Sevres Peasant Confederation thupuangtu Benoit Jaunet thung chuan, “Vawiina thil thleng hi tui humhim kan duh avanga thleng hi pension chungchang nen in ang reng a ni” a ti a, “Tharumthawhna kan hmachhawn pawha in ang reng a. Kan hna, kan tui te hi mi tlemte te hamthatna tur chauha ruksak kan nih kan remti dawn lo, a dik bawk hek lo” tiin a sawi.
Pension kum tihsan duhlolhna avangin France ram a buai hle a, King Charles III an Paris leh Bordeaux tlawh a tum pawh President Macron ngenna angin thulhin a awm phah hial bawk.
France ramah buaina dang inmung chhuak
