Ningani zan khan football palian ve ve Brazil leh France chuan Gillette Stadium, Massachusetts, USA-ah international friendly match khelin, 2-1-a Les Bleus chakna goal hmasa zawk khungtu Kylian Mbappe chuan ram tana game 95 a khelh tawhah goal 56 a tilut tling chiah a, France tana goal khung hnember record ding lai nihrualpui turin goal khat chiah a mamawh ta.
France captain Mbappe hian first half minute 32-ah Ousmane Dembele ball pek um lutin Brazil keeper Ederson lo tlanchhuak pelin goal hmahruai a thawh a, match 137 khela goal 57 khung tling chunga international football chawlhsan tawh Olivier Giroud-a record ding lai chu Real Madrid forward hian a khum nge nge dawn e!
World champion tum hnih ni tawh France goal hnihna hi minute 65-a Hugo Ekitike tihluh ni thungin, he mi hma second half tir lam minute 55-ah Brazil full-back Wesley laka last man Dayot Upamecano a ‘foul’ avangin hnawhchhuah a ni.
Si hnih faia hma an hruai hnu lawkah France boss Didier Deschamps chuan kum 27-a upa Mbappe lachhuakin Marcus Thuram a luhtir a, France captain tan record pumbilh turin game dang nghah leh rih phawt a ngai.
He forward hmuhnawm hian rawlthar kum 18 mi lek ni chungin kum 2017 khan a France debut nghak chhuakin, tum hnih ngawt a ram chu World Cup final a luhpui tawha a hmasa zawkah a champion-pui nghe nghe.
Kuminah khup hliamin a tlakbuak avangin a khelhna club Real Madrid tan pawh February ni 22 kha starting line up a chan hnuhnunber a ni tawh a; tunah a dam a, ram tan bul a tan leh theih rualin goal a khung zui leh nghal zat a ni.
France ngam loa tlawm Brazil manager kha Real Madrid boss hlui Carlo Ancelotti niin, French-ho laka a team hawihai lutuk tur chhan turin minute 78-ah a centre-back Bremer chuan Luiz Henrique siamsak atangin Brazil si phurh pakhat zawk a sut then a, chu bak South American team-in goal dang an khung belh zawh loh avangin an tiatpui lakah an tlawm ruah!
Brentford forward Igor Thiago chuan kha game-ah khan a Brazil debut nghakchhuak turin Manchester United player Matheus Cunha a thlak a, a team tlawm tur erawh a chhan zo lo.
Brazil khan fit tawk loh avanga Ancelotti squad luah zo leh ta rih lo Brazil all-time top scorer Neymar an chhawr thei lo a, kumin World Cup-ah ram tan a inlan thei dawn em tih pawh a chiang lo zo tawh!
Team pahnih inkhelhna Gillette Stadium kha NFL team pakhat New England Patriots home ground niin, France-in kumin World Cup-a an group game hnuhnungbera Norway an hmachhawnna tur khelmual a ni.
France record tluk tura goal khat chiah mamawh tawh Mbappe
