French Open qualifying atangin
Raducanu inhnukdawk
Kum 2022-a second round a thlen bak French Open-a la inlan lo Emma Raducanu chu kumin Roland Garros clay-court tournament-ah pawh kan hmu leh dawn lo niin a lang a, French Open qualifying khelh mek atangin a inhnukdawk tih a puang tlat!
Kum 21 mi hian kum 2021-a US Open title a rawn lak nawlh hnu khan tournament liana chetthat a harsat chhunzawm ta ngat ngat a, kumin French Open main draw-ah pawh a hming hmuh tur a awm dawn ta lo niin a lang a, a inhnuhdawh chhan hi puanzar a ni lo thung.
Nimin atangin qualifying hi khelh tan a ni a, May ni 26 atang khian French Open tak tak an khel tan ang.
Raducanu hi clay-court Grand Slam khel turin ngaihnathiamna (wildcard) pek a ni lo a, Paris-a a inlan duh a nih chuan qualifying a paltlang a ngai dawn a, mahse, a inhnuhdawh thawm hriat tur a awm zui ta a ni.
Hliamin a tihbuai ve reng Briton hian thla hmasa Madrid Open first round a paltlang zawh loh hnu khan tournament a hmachhawn leh ta lo vang vang a; kha mi tum straight-set hmanga Argentine qualifier Maria Lourdes Carle a hneh loh hnu khan Raducanu chuan rilru leh thathona kawngah a chau tawngkhawng tih a sawi a, chu mi kal zel chu French Open qualifying-a a inhnuhdawh chhan hi a ni em tih erawh hriat theih a ni rih lo.
Hliam leh khelmual a luh tum pawha a chetfuh hleih theih loh avangin WTA ranking lamah pawh Radu hi 212-na daih a ni tawh a, nikuma a banrek leh kheimit hliam an zai hnua world ranking-a 303-na a luah atang khan rawn kang chho leh hlek mah se hmalam pana kal a harsat chho zel rih a ni.
French Open qualifying a\angin Raducanu inhnukdawk
