England leh Europe khawmuala football club ropui Liverpool neitu Fenway Sports Group (FSG) chuan an chanvo hralh then an remti a. Dynasty Equity hnenah chanvo £82-164m hu an hralh then dawn.
Liverpool hian Covid 19 hri len lai khan £100m zet an hloh a. 2023-24 season thar tan a nih dawn khan player thar Dominik Szoboszlai, Alexis Mac Allister, Wataru Endo leh Ryan Gravenberch lei nan £145m zet an seng bawk. Heng bakah hian sum senna neuh neuh an ngah chho viau bawk. Kirkby-a training ground thar siam nan £50m an seng a. Anfield Road Stand tih hmasawn nan £80m an sneg a. Main Stand siam nan £114m zet an seng leh bawk. Heti a nih vang hian an club neitu FSG hian bank lamah leiba an ngah sawt viau a. An leiba tihniam turin an chanvo thenkhat an hralh phah ta hial a ni.
An leiba tihniam a, an mawhphurhna rit lutuk tihziaawm nan FSG hian club a chanvo neitu thar tur an dap reng a, global sports investment firm Dynasty Equity nen inremna an nei thei ta a ni. Chanvo neitu thar tur an hmuh fel tak vangin Reds hian sum leh paiah hmasawnna thar an nei tura ngaih a ni.
Liverpool neitu Fenway Sports Group hian kum 2010 khan £300m sengin Liverpool-a chanvo lian ber an lei a. November 2022 atangin an chanvo hralh then in, shareholder thar an zawn an rilruk tan a, kum 2023 kum tawp lam a lo thlen chuan Dynasty Equity nen inremna an nei fel thei ta a ni.
FSG in an chanvo hralh \hen dawn
![](https://theaizawlpost.org/wp-content/uploads/tap_logo-min-large.jpg)