Cryptocurrency exchange tlachhia FTX te chuan an customer te sum an batsak an pek vek hnuah pawh dollar billion tel an la nei tiin an sawi a.
FTX te chuan an assets te an hralh vek hunah chuan an leiba $ 11 billion an pek piah lamah a vaia an sum hmuh tur chu $ 16.3 billion vel niin harsatna an nei dawn lo tiin an sawi.
Company in reorganisation plan a siamah chuan an customer te chuan November 2022 a FTX a tlukchhiat laia an sum hloh te chu an hmulet leh vek dawn a ti bawk.
Kumin March thla khan FTX co-founder Sam Bankman-Fried chu customer te leh investor te bumah thiamloh chantirin kum 25 lung in tang tura tih a lo ni tawh a.
“Tunah chuan chapter 11 plan kalpuia non-governmental creditors te hnenah 100% bankcrupty claim mai ni lo interest te nen veka pe thei dinhmunah kan ding ta a ni,” tiin FTX new chief executive John Ray chuan a sawi a. Mahse, FTX tena ruahmanna an siam chu US bankruptcy court in a pawmpui a la ngai thung.
FTX te chuan an leiba te rulhna funds te chu an assets investment Alameda Research or FTX Ventures businesses a share hralhin an nei thei dawn an ti a. Alameda hi crypto trading firm Bankman-Fried enkawl tho a ni.
FTX te chuan an bankrupt hnua crypto man sang chuan an finance lamah engmah hlawkna a thlen lo an ti bawk a. Bitcoin leh digital currency dang dang te company tlakchhiat laia exchange a awm te chu a bo tiin an sawi bawk.
Cryptocurrency lian ber Bitcoin man chu FTX company a tlakchhiat hnu atangin 270% velin a sang tawh a ni. FTX kha a tlakchhiat hma chuan khawvela crypto platform lian ber zinga mi a ni.
FTX ten an leiba rulh theih thu sawi
