Full literacy state-a puan kan nih theihna Adult Education – Education minister

Full literacy state-a puan kan
nih theihna Adult Education
– Education minister
ULLAS scheme hnuaia full literacy state-a Mizoram puan a nih theih chhan chu Adult Education Wing hnathawh rah a ni tih Education minister Dr Vanlalthlana chuan a sawi.
Nilainia Meichher Award 2024 sem a hmanpuinaah School Education minister chuan, Meichher chanchinbu chu tunhma atangin Mizoram history pawimawh leh thu leh hla tha tak tak chhuahna a ni, tiin, “Mizote tan thil hlu dahna ang a ni a, thu leh hlaa hnuhma a neih hi a hlu hle,” a ti.
Puitling tawhte ziak leh chhiar zirtir chu thil awlai lo tak a ni tih Dr Vanlalthlana hian a sawi a. Adult Education Wing-in kum upa tawhten ziak leh chhiar an thiam theihna atana hma an laknaah fak a phu tih a sawi. ULLAS scheme hnuaia full literacy state-a puan kan nih theihna pawh Adult Education hnathawh rah a ni, tiin, ziak leh chhiar zirtirtu volunteer teacher-te thawhrimna chhuanawm a tih thu a sawi bawk.
Meichher Award 2024 dawngtute chu: Best Article of the Year 2024-ah pakhatna Rev Dr Lalchawimawia Zemabawk Aizawl; pahnihna Prof Chawngsailova Chawlhhmun Aizawl; pathumna Rev VL Luaia Hranleh, Mission Veng.
Meichher Best Contributor of the Year 2024-ah pakhatna B Lalthangliana, Chhinga Veng Aizawl; pahnihna Familia Fanai Laltansanga, Zotlang Lunglei; pathumna Mahmuaka Chhakchhuak, Chanmari Lunglei.
Award hlannaah hian department officer-te leh thawktute, Award dawngtute leh an chhungte, Mizo Academy of Letters leh Mizo Writter Association hruaitute an tel a ni.
8 Adult Education Wing tihchhuah thlakip chhuak hi a tirah ‘Zoram Eng’ tih a ni a. 1975 March & April chhuak kha a bultanna a ni.
8 Tulna leh remchan zawkna avangin ‘Zoram Eng’ tih chu 1975 October chhuak atangin ‘Meichher’ tia thlak a ni. Tun thlengin a hming thlak tawh loin ‘Meichher’ hi tihchhuah chhunzawm a ni.
8 Kum 1975 March & April chhuak atanga chhiarin May 2025 chu bu 807-na a ni.
8 Meichher hi sawrkar sum sengin a tir atangin thla tin bu 3000 a tihchhuah a ni a, a thlawna sem a ni. Covid len zual lai khan thla engemawzat bu 2800-a tihchhuah a ni a; 2022 November atanga tun thlengin bu 3000-a tihchhuah zui a ni leh.