ia tlaia fur ruah a a tlak chauh avang leh a sur tlem avangin lo neitute chu nipui thlai chi hrang hrang – buh, la, vaimim leh bekang chinah harsatna an tawk mek.
India hi khawvela buh thawn chhuak tam ber ram a ni a, khawvel puma thawn chhuah zinga 40% vel a tum a ni.
Lo neitute hian June leh July thlaa fur ruah atangin nipui thlai chi an thlak tan thin a; mahse, kuminah hian chhim lama Kerala chu fur hian a nih dan thin aia ni thuma tlaiah a thleng chauh va, khawthlang lama lo neih hmun hrang hrangah phei chuan chawlhkar hnih vel zetin a tlai.
Fur ruah hi tam tak sur theihna hun erawh a la awm a, thlai chin tlaiin a nghawng tur hi chiang taka sawi theih a la ni lo.
Sorkar kudama buhfai dah khawm chu a phai phah deuh tura ngaih a ni a, kum kalta aiin 15% zetin dah khawl hi a pung a, June thla tir lama a tam ber tum a ni.
Agriculture & farmers’ welfare ministry-in a chhinchhiah dan chuan June 25 thleng khan lo neitute chuan hectare maktaduai 18.27-ah nipui laia chin thin thlai chi an thlak tawh a, kum kalta aiin 23% velin a tlem zawk.
Buh hi hectare maktaduai 2.58-a zauvah chin tawh a ni a, nikuma hectare maktaduai 3.44 chin aiin a la zim hle tih an tar lang.
Lo neitute chuan hectare 6,92,000-ah bekang an ching tawh a, kum kalta aiin 65% zetin a tlem zawk a. Vaimim chu hectare maktaduai 1.57-ah ching tawhin a hma kum aiin 16%-in a tlem zawk . La pawh nikum tun ang huna chin aiin 35%-in a tlem a, hectare maktaduai 2.97-ah an ching tawh a. Fu erawh 1.2%-in a pung thung a, hectare maktaduai 5.7-a zauvah an ching tawh.
June 1 atanga thla li chhung awh tur ruah sur hun vanglai a intan atang khan tun thlengin ram chhungah a sur thin zat aia 42% zeta tlem a sur a; mahse, hmun thenkhatah phei chuan 92% zetin a tlem zawk niin weather department chuan a tar lang.
Lo neih kaihhnawiha sumdawng, Olam Agri India-a Deputy Head Nitin Gupta chuan July thlaa fur ruah a tlak tak tak hunah buh chin hi a la pung dawn niin a sawi.
Mumbai-a khawvel huap sumdawnna hmunpuia thawk dealer pakhat chuan lo neituten thla chi thlak hun an la neihte an hman tangkai theih nan July thla chawhma lamah tal an mamawh tawk ruah a sur a ngai dawn tih a sawi.
Ruah a sur tlem chhunzawm zel chuan thlai thar bakah chin zat a nghawng dawn niin a sawi bawk.
India hi buhfai thawn chhuak tam ber a nih ralin thlai hriak la lut tam ber a ni bawk a, a mamawh tam ber hi Indonesia leh Malaysia atanga palm hriak a lei a ni a. Argentina, Brazil, Russia leh Ukraine atanga bekang tel leh nihawi tel a lei thin bawk.
Fur ruah tlaiin lo neitute thlai chin nghawng mek
