Shiv Sena (UBt) leh trinamool Congress atanga hel MP-te hma lam hun chungchanga thutlukna chu July thlaa parliament-a fur thutkhawm hmaa siam a nih rin a ni a, Lok Sabha Speaker Om Birla chuan lehlam lehlam thlirna a lak khawm hnuah thu a titlu hnai a ni.
Birla hian Nilaini khan Shiv Sena MP paruk, Eknath Shinde-a kaihhruai lama an kal chungchangah Uddhav Balasaheb thackeray-a kaihhruai lam hruaitute thu sawi a ngaithla a. Hei hi speaker-in he thil chungchanga mi a rawnna hnuhnung ber tur nia hriat a ni.
thutlukna siam tur hi party pahnihte nghawng lian tak ni thei tur a ni a, anti-defection law hmangin MP helte hi an nihna hlihsak (disqualify) an dil mek a ni.
Speaker hian kar eng emaw zat kalta atang khan party pahniha lehlam lehlam hi vawi hnih ve ve a kawm tawh.
Nilaini khan Shiv Sena (UBt) hruaitute nena an inkawm leh a, hei hi Shiv Sena leh tMC inthen mek chungchanga ngaihdan a ngaihthlak tawpna nia sawi a ni.
Speaker pisa hian thutlukna siam hmain danpui leh dan lam thiamte a rawn hmasa leh phawt tura ngaih a ni a. Hetiang thil lo thleng tawhte pawh ennawnin eng angin nge thutlukna siam a nih tawh thin tih pawh thlithlai a ni ang.
Shiv Sena (UBt) buaina hi an party hminga thlan tlin Lok Sabha MP pakua zinga parukin Maharashtra Deputy Chief Minister Shinde-a kaihhruai, Shiv Sena hming pu tho, anmahni atanga peng ta an zawm atanga intan a ni a. Shiv Sena (UBt) hian an MP parukte hi anti-defection hmanga disqualify tur an nih thu an sawi a, speaker hnenah pawh an thlen.
Nilainia Birla an kawm hnuah party MP pahnih, Anil Desai leh Arvind Sawant te chuan speaker chu danpui vawng tlat turin an ngen tih sawiin, MP helten a hnena thil an thlente an zawt bawk.
Sawant-a chuan thuthar thehdarhtute a kawmnaah, “Helte hnen atangin ngenna a dawng em tih kan zawt a…,” a ti a, speaker hian an hnen atangin ziakin engmah a dawn loh thu a hrilh tih a sawi.
Shiv Sena (UBt) hruaitu, Aaditya thackeray-a chuan an party buai chungchangah hian, “Rorelna dik kan beisei,” a ti.
February, 2023 khan Election Commission chuan Shinde-a kaihhruai lam hi Shiv Sena dik takah a lo pawm tawh a. Ani hian kum 2022 khan helna a lo kaihruai tawh a, Shiv Sena chu tithenin Maharashtra-a an kaihhruai tangrual, Maha Vikas Aghadi sorkar pawh a tlak phah a ni.
Speaker hian West Bengal-a tMC buainaah pawl hnihte thu pawh a lo ngaithla tawh a. tMC general secretary, Lok Sabha-a an hruaitu, Abhishek Banerjee kaihhruai palaite chuan Birla hmuin MP helte chu disqualify an dil.
Kum 2024-a Lok Sabha inthlanpuiah khan tMC ticket-a MP 29 thlan tlin zinga 20-te chuan an party chhuahsanin West Bengal-a pawm loh political party, Nationalist Citizens Party of India an zawm a ni.
Heng MP chhuakte hian Narendra Modi-a sorkar an thlawp thu leh NDA zawm an duh thu an sawi nghe nghe.
Speaker-in a thutlukna a ngaihtuah mek lai hian Lok Sabha Secretariat pawhin fur thutkhawm hmaa MP-te thutna tur ruahman dan a buaipui mek.
tMC leh Shiv Sena (UBt)-a hel pawlte bakah hian DMK chuan Congress thlawp lo lama thut dan an dap mek a, hei hi Congress-in hun rei tak ata tamil Nadu party nena an inzawmna titawpa Chief Minister C Joseph Vijay-a party, tVK an thlawp vang a ni.
Shiv Sena leh tMC buaina chungchanga speaker thutlukna a chhuah hnuah MP helte chu Lok Sabha-a an dinhmun an hum a ni dawn nge anti-defection law hmanga paih an ni dawn tih a chiang dawn a ni.
Fur thutkhawm hmain speaker-in Shiv Sena leh TMC buaina tihfel beiseiawm
