Furpui thlen hmain…

Furpui a lo thlen apianga Aizawlin harsatna pakhat a tawh ziah chu, bawlhhlawhin tuiluankawr a hnawh avanga tuihawkin luan ngaihna hre lova harsatna a siam thin hi a ni. Nikum maiah pawh Dinthar vengah chuan tuihawkin in a chim a, harsatna nasa tak a thlen phah a. Khangte kha bawlhhlawhin tuiluankawr a hnawh nasat vang a ni, a rapthlak hle. Kum hmasa lamah pawh Ramthar veng lamah tuihawkin chenna in tam tak a chim vak tawh a, kha pawh kha tuiluankawr hnawhtu bawlhhlawh vang bawk a ni.
Tuiluanna tur tuiluankawr kan siam sauh sauh a, bawlhhlawh kan paih ta mai thin a. Bawlhhlawhte hi ruah a sur hma daih atanga paih a lo nih tawh thin avangin, tuiluankawrah a insawhmuk nasa tawh a, tuihawkin a hnawl tawlh mai thei thin lova, tuiluankawr pawn lamah tuihawk a luang liam ta vak thin a, chu chuan kawngpui dung zawhin chenna inte a chim ta chiam mai thin a ni. Tuihawkin a hnawl chhuah theih bawlhhlawhte pawh kawngpui dungah a inchhep vum hner hnur thin bawk.
Hetiang hi kum tina kan tawrh dan a ni a, hetiang thil a lo thlen chhan pawh hi kan hrechiang thawkhat viau tawh, mahse kan titawp thei lova, Furpui a lo thlen chuan, kawngpuiah bawlhhlawh a rawn invawrh chhuak leh dawn tih hi zawlnei puan lawk ngai lova thleng dik ziah a ni.
Enga ti nge he thil hi kum tin a thlen ziah? A chhanna chu hriat sa a ni. A chhanna kan hre kur si a, engatinge kan tihtawp theih miah loh? He zawhna pawh hi kan chhang thei vek ang. A chhan chu, hetiang thil thleng lo tura hmalakna a awm thin loh vang a ni ber mai.
Kuminah hi chuan, tuihawk luanna tur tuiluankawr thenfai leh, Furpui a lo thlen hmaa fai reng tura tuiluankawrte venhim hi, khi’ng a chunga harsatna lo thleng thin kan sawi takte sutkian theihna tur a ni. Furpui a lo thlen hma atanga kan lo inbuatsaih hman chuan, kum danga tuihawkin harsatna thlen thin ang kha kan pumpelh thei ngeiin a rinawm a. Furpui lai chauh loah pawh, kum tluana tuiluankawr a fai reng theihna turin, AMC Ward 19 te hian hma an la thei tura ngaih a ni. Chuti ni lova, a ngai te bawka khawpui hi tuihawkin a tibuai leh a nih chuan, khawpui sawr kar AMC tan a mualphothlak leh hle dawn tihna a ni a, khawpui vawng fai thei lo municipality kan hrawn tihna a ni bawk ang.