Furpui thleng tur thlir chungin
‘Fimkhur Thla’ ah hmang dawn
April thla chu fur intan hun tura ngaih a nih angin, Central YMA chuan chhiatna laka kan him theihna atan ‘Fimkhur Thla’ ah a puang a. Hemi denchhen hian Sub-Hqrs., Group leh Branch ah bawhzui tum a ni.
2024 YMA rorel inkhawma pawm angin, furpui thlen hmaa inralrinna hun – Fimkhur Thla hi March 28 zan khan Central YMA Hall-ah hawn a ni a. Central YMA hian ngenna tichhuakin, in hmun leh lei laiten furpui thlen hmaa an lei laihte nghet taka lungrem/ concrete-a tih ngheh hman nise a ti. Thal chhungin mitinin tuidawn leh tui paihna mumal taka siam a, tui chhe paihna kawrpuiah tha taka luanluh tir ngei nise a tih bakah khaw tin/ veng tinin an huamchhunga lui leh kawrte hnawhtu a awm leh awm loh leh a him tawk em, tih enfel vek a, a him tawk loa an hriat chu thenfai ngei nise, a tul dan azirin YMA hnatlang pawh koha tih that vek ni bawk se, a ti.
An huamchhunga lungrem leh culvert a him tawk leh him tawk loh dan enfel a, a him tawk loh chuan tih that thuai dan ngaihtuah nise tiin, Sub-Hqrs., Group leh Branch a chah a. Thing zar leh thingzar ro tluk hlauhawm chu Forest department hriattir emaw, thenfai nise, kham/ kawngko sanga lung tla leh leimin mai thei a awm leh awm loh enfel a, hlauhawm a awm chuan hma lak nghal nise, a ti bawk.
Mahni huamchhunga lei tlahniam hlun leh min thinna hmunah, chhiatna nasa zawk thleng thei turte uluk taka enfel a, a tul anga invenna siam nise, a ti a. Thlanmual a him em, tih uluk taka enfel a, a tul anga thlan chung pawh tui lut theilo tura cement-a zut phui vek nise, tiin, fur ruahpui leh thli-ah chenna in a him dawn loa a lan chuan chhuahsan rih mai tha a tih thu Central YMA hian a sawi a ni.
Heng an tarlan hoa YMA Branch-ten Fimkhur Thla an hman dan chu Central YMA-ah thehlut leh turin a ngen a ni.
Furpui thleng tur thlir chungin ‘Fimkhur Thla’ ah hmang dawn
