National Highway No. 302 Lunglei to Tlabung kawng tih len mekah furpui vanga mipui tawrhna nasa a thlen tawh loh nan contractor leh thuneitu lamin chak zawka hma la turin an beisei tih Lunglei MJA chuan an sawi.
MJA Lunglei District hian May 9 & 10 khan NH 302 kawng sial mek hi Kawrpuichhuah thleng an tlawh a. An thil hmuh dan report siamin, Phairuangkai lei chu a thar dawh tur niin, hemi peih hma hian a hlui hman zui tura tih chu siamthat phawt loh chuan lirthei rit phur tan zawh tlak a ni loa, a lei chhuat thir phek phah tur chu phai atanga chah mek niin, an thil chah hi a rawn thleng har tawh hle a, company lamin a rang thei ang bera a chah thlen a duh tih a sawi. Tunah hian a helna siam ni mah se, furpui thlen hunah chuan a tlo dawn loh bakah a nal hle dawn a, ngaihthah chi ah a ngai lo tih a sawi bawk.
Tuichawng lei pawh a hluiin a chhe tawh a, Phairuuangkai lei ang bawka a thar dawh tur niin, lui chunga a helna siam chu tuilianin a len chhia a, furpui thlen hma ngeia siamthat a tul a, hna hmanhmawha neih nise an duh tih MJA hian an sawi.
‘He leiah hian quintal 60 aia rit lirthei kal phal loh tih a ni a, a chhuatphaha thing an phah chu a nghet loin enkawltu neilo ang mai a ni. A structure a tuiek nual a, chhiatna lian zawk a thlen hmaa chetlak a tul takzet,’ a ti.
Khua a lum vang nge, an tlawh lai hian hnathawktu mumal hmuh tur an awm lo tih MJA hian sawiin, ruah a sur hlekin chirhdiak a tam a, diak hi awlsam zawka lirthei a kal zung zung theih nan contractor-ten thian zel thei se an duh tih an sawi.
Leivung paihna (spoil bank) chu hmundang ang bawkin mumal taka siam a awm loa, kawngthlangah nawr liam mai mai a tam tih an sawi bawk. ‘Awmze nei zawka leivung hi paih nise tih hi MJA duhdan a ni. He kawng laih mekah hian Mizo mipui tumah indah hrang lo leh ralthlir mai loin, kan zavai ta a ni tih hria ila, hnathawh dan pangngaia kawng laituten hna an thawk a nih chuan hnathawktute tan harsatna siam lo ila kan duh. Hetihrual hian hnathawh dan pangngai ni lo leh hmanraw tha lo, leivung paih dan diklo leh mipui namnul zawnga hnathawh a awm a nih chuan, thil tha zawk kan neih theih nan tangrual tlat ang u, tih hi kan duhdan a ni,’ a ti.
NH 302 Kawng Sial Mek Ngaihventu Pawl (Tlabung) thahnemngaihna leh he kawng an vil dan chu MJA Lunglei chuan tha a tiin tha thlah loa vil zel turin an chah tih a sawi a ni.
Hei bakah hian Lungsena PHC buildiung sak zawh tak leh PGCI Ltd-in power sub station a siam mek pawh MJA Lunglei District hian an en a, mipuiin tangkai zawka an hman theih nan rintlak leh tlo, rotling ngeia chhuah turin hnathawktute a ngen tih a sawi.
Furpui vanga harsatna thleng lo turin NH 302 thawmthat ran duh
