British heavyweight boxer lar, World champion ni tawh ve ve Tyson Fury leh Anthony Joshua te chuan kar tawp khan hnehna an chang ve ve a, ring chhungah intawngin an inhmachhawn thei dawn ta nge nge.
Fury a chak awlsam
Kum 37 mi ‘Gypsy King’ an tih mai Tyson Fury chuan inrinni khan Pattaya a Max Muay Thai Stadium-ah Mariusz Wach a hmachhawn a, knock out in hnehna a chang.
Entu mipui 1500 pungkhawm hmaa Futy hian a khingpui a ngam hle a, round sarih an inhnek zawh thlengin a awpbet tluan. Wach lakah hian tuanrang zawk a nih a chhawr tangkai a, a khingpui hi a hnek fuh fo. Wach tan leh amah tantute tan phur hluaina tur a awm lo tluan naa round sarih an inhnek zawh thlengin Fury hian a khingpui a hnek tlu thei bik lo.
Boxer tha leh huaisen Tyson Fury lakah ding hram hram mah se round 8-naah Wach hian inhnek zui lova tlawm mai a thlang. A khingpuiin a tlin tak ngang si loh vangin Fury chuan knockout in hnehna a chang a, Anthony Joshua hmachhawn thei turin hma lam a pan.
Joshua a tlawm teuh
Tyson Fury-a’n Thailand lamah awlsam taka hnehna a chan laiin Anthony Joshua erawh Saudi Arabia lamah a tlawm teuh viau thung a, Fury hmachhawn tur a awm lo teuh ther ther hle.
Champion hlui Joshua hian Jeddah, Saudi Arabia-ah Kristian Prenga a hmachhawn. A khingpu lakah hian round khatnaah tumhnih ngawt a tlu hman a, tlawm ngei tura ngaih a ni hman. Prenga hian boxer lar Joshua hi ngam takin a nawr a, an inhnek tan atanga second 22-na lekah a hnek tlu nghal tawp. Joshua hi thochhuak leh mah se round khatna tawp dawn tep-ah a hnek tlu nawn leh a, Joshua laka chak turin a dinhmun a tha hman hle.
Chhe zetin bul tan bawk mah se round hnihnaah Joshua a insiam tha a, beisei phak baka thain a kir. Hnek na zet mai Joshua hian round hnihna tir lamah chiang zetin a khingpui a hnek fuh zawn a, Prenga a talbuai chho. Hei vang hian Joshua a phur a, na takin a khingpui a nawr. A khingpui Prenga hi ring kilah a dang bet a, chiang zet zet a hnek fuh zawn hnuin a hnek tlu a, a khingpui hi thochhuak tur awm tawh lova, Joshua hian knoc-out in hnehna a chang.
Palian huanga boxer tha leh lar tak Anthony Joshua hian December, 2025 khan Nigeria-ah Car accident a tawk a. He accident-ah hian a thian hnai Sina Ghami leh Latif Ayodele te an boral. Vanduaina an tawh hian Joshua hi tisa leh rilru lamah a nghawng na hle a, inhnek chawlhsan a rilruk hman hial. An accident hnua a vawi khat nan inhnek a hmachhawn a, Prenga lakah tlawm teuh viau mah se pui takin a come-back-ah hnehna hlu tak a chang. He hnehna hian Fury hmchhawn turin a hruai thleng dawn ta nge nge niin a lang.
Fury vs Joshua
British boxer lar Tyson Fury leh Anthony Joshua te hi an vanglaiin inhnek an lo tum fo tawh a, an indawr hlawhtling thei thei tlat thin lo. Inhnek tuma thawn nei reng chungin a tak ram a thleng hlei thei lo thin a, an uaithlak lamah erawh an inhnek ve dawn ta nge nge niin a lang a, an indawr fel tawh. Inhnek turin indawr fel tawh mah se an kawng dal theitu pakhat a la awm a, chu chu an inhnek hmaa inhnek an hmachhawnah an chak ve ve a nih loh chuan an inhmachhawn thei dawn lo. Chu fiahna chu Wach leh Prenga lakah an paltlang ta a, tunah chuan an kawng daltu tur a awm ta rih lo.
Fury leh Joshua te hi world champion hlui ve ve an ni a, tawnhriat an nei tha dun viau bawk. Kum upa zawk Fury hian inhnek vawi 39 hmachhawn tawhin vawi 36 a chak a, vawi khat draw neiin vawi hnih dang tlawm zawkah a tang. Vawi hnih a hneh loh hi palian huanga kawnghren pali kawl khawm thei hmasa ber Oleksander Usyk a ni. Kum 37 mi lai ni tawh ma se ring chhungah boxer tha leh huaisen a nihzia a la lantir thei reng a, Joshua hneh turin a inring tawk hle.
Olympic champion hlui Anthony Joshua hi kum 36 mi lai a ni ve tawh a, Fury aiin kum khatin a nuapang hret. Inhnek vawi 34 hmachhawn tawhin vawi 30 a chak a, tlawm zawkah vawi li a tang. Joshua pawh hian tum hnih ngawt Usyk a hneh lo ve tho bawk. Tun hma atanga a hmachhawn chak em em Fury hneh ngei turin a inringtawk hle.
Fury leh Joshua te inhnek hun atan hian November 2026 ruahman a ni a, an inhmachhawn thei a nih chuan inhnek ngaihven hlawh tak a ni ngei dawn a, sum pawh a tam hle tura ngaih a ni.
Fury leh Joshua an intawng dawn ta
