By Frankie Zonunmawia
Kum 1960 chho bawr kha India ramin ei leh bara harsatna a tawh lai a ni a, Mizoram ngeiah pawh tam do pawl (Famine front) hial din a nih phah ta a a nih kha. India khan USA hnenah Wheat (buh chi khat) a dil a, an lo phal lo a ni. Heta USA a uikawm em avang hian India chuan ei leh bar lama hmasawn tumin kum 1967 khan Green revolution tanin, Ei leh bara intodelh nan fertilizer (lei tha), pesticide(rannung hlo), lo neih nana ram awl theh leh khawl hmangin theih tawpin hma a la ta a, hma a lakna state langsar te chu Punjab, Haryana leh Uttar Pradesh te an ni. Tunah chuan ei leh barah India a intodelh ta a, India ram pumin an thawh chhuah kan ei a ni.
Tichuan kum 20 vel a ral hnu chuan, Punjab leh Haryana state te chuan harsatna lian pui an nei ta tlat mai. An vanglaia an ram leilung tha te chu a ro zova, fertiliser hna thawh chu a tirah tha mah se khua reiah leilung a ei chhia a, thlai thar nghal mah se an tona lei erawh a chhe telh telh a, kum tin fertiliser hman tam tial tial a ngai a, taksa tana hrisel lo tham a ni ta. Hetah tak mai hian hmuh theih loh thilte lo hmu lawk ang main Sikkim state chuan kum 2003 khan Organic (fertiliser leh hlo tel lo) state nih tumin hma a la tan a, Mizoram pawhin kan tum ve a nih kha.
Kum 2023 a lo her chhuah meuh chuan Sikkim Organic Mission brand siam chu International leh ram chhung market-ah pawh hmun a chang sang ta vah mai. Tuna G20 summit kan thlen dur dur lai hian Mizoram hian eng local brand nge kan lo kawhhmuh ve? Entrepreneurs ni chuang si lo Department staff hrang hrangte hospitality staff-a inleh run pui hun mai em ni? Bamboo leh Anthurium bawk em ni? Organic kher ni lo Mizoram local brand te, Human resource agency te awmkhawmna Brand/Agency lian lo kawhhmuh tur kan nei ve em?
Organic state nih hi thil namai a ni lova, Sikkim pawhin a tahtawl (stage) te tein kum 15 dawn chhung chu a hlawkna lang tham lovin hma an la a ni. Mizote hna beisei dan nen a inang lo ta hle. Kum 10 vel thawha kum 50 daih hlawkna neih ai chuan thla 6 daih pawisa dawna kum 5 chhung retheih te pawh kan duh zawk tak hi. Hna thawh lang nghal duak duak project ni lo chu kan tui pui lo thin. Sri Lanka te khan organic state nih an tum a, a tahtawl te te a hna an kal pui a nih loh vangin tunah chuan leiba avanga tal buai mek an ni tih kan hre theuh ang.
Tunah G20 summit te hial kan lo thleng ta a, Sikkim Organic Mission brand chu khawvel hmelhriat a lo ni ta der mai. Thawh chhuah dang lian tham an nei lo ni tih an inhre chiang a, an neih chhun loneitu hrang hrangte thar organic thlai chu a hlawmin sumdawnna nihliap pakhat hnuaiah an khung khawm thei bik a ni. Ram changkang apiangin Organic an ngaisang a, a man pawh a to bik. An brand value a sawn tawh em avangin Sikkim Organic product chu thil man tlawm te nena zawrh pawlh chi loh huangah an dah hial tawh.
Sikkim loneitute chuan an thlai thar te chu anmahni te tea hralh a, khar chhawngte (middle men) thu thua thlai man chhiar a, hlawkna hrang theuh tel tum lovin Sikkim Organic brand pakhat hnuaiah an thlai tharte chu an zuar mai a, khar chhawng ho pawhin brand lian an nih vangin an va tibuai thei lo. Loneitute hlawkna chu loneitute tan a ni an ti mai. An organic mission hi an la thutak hle a, Buyer-Seller meet te sawrkarin a siamsak thin a, lam kalte intirin APEDA kal tlangin G20 ram hrang hrang Australia, Middle East leh Europe-ah te market an zawnsak thin a ni. Anni zawngin G20 pi leh pute lo kawhhmuh tur an nei dawn.
Sumdawnna neih pui turin G20 ram ten Mizoramah investment rawn ti ve dawn se invest-na tlak local brand lian chhawp chhuah tur kan nei ve em? Kan rama tha duh tak tak, fertiliser hman ngai lova duah hluah thei leh dangdaina bik nei thlai kan neih te hi zawn chhuah mek niin sawi a ni a, entir nan heng Mizo thlai tlawm tak Telhawng te, Hmarchate sen (Rim na bik, thak bik leh sen tha bik a nihna te), Sawhthing (Rim na bik leh a phan awm lo a nihna te), Ailaidum (damdawi a nihna te) leh Nursing lama chhawr nuam kan nihna te hi ram dang mite duh zawng an ni a, an duh zawng hriain sumdawnna hliap (Brand/Agency) lian khat hnuaiah lo inzuar ila awmzia a nei thuk deuh ang em? G20 summit hian Mizo mipuite min kai harh dawn em le?
G20-ah Hmarcha tê
![](https://theaizawlpost.org/wp-content/uploads/tap_logo-min-large.jpg)