G20 summit-a tel Modi-a’n ram hrang hrang hruaitute kawm
Prime minister Narendra Modi chu G20 summit hmang turin Brazil-ah a awm mek a, ram hrang hrang hruaitu engemawzat kawm nghalin, an ram leh India thawhho theih dan turte a sawipui hlawm.
Modi hian New Delhi atanga Nigeria panin, heta tang hian Brazil a pan leh nghal a, G20 summit-ah hian Italy, Indonesia, Norway, Portugal, Egypt leh South Korea hruaitute hmuin, India nena inlaichinna tha an neih dan turte a sawipui hlawm a ni.
Hei bakah hian sorkar thuchhuaha a lan danin Modi hian International Monetary Fund (IMF) deputy managing director Gita Gopinath leh European Union (EU) president Ursula vo der Leyen te a kawm bawk.
Pathianni chawhnu lam khan Modi hian Brazil thlengin, thawhtanni khan Italian prime minister Giorgia Meloni nen sumdawn tawnna leh hmasawnna lama inzawmna tur bakah, ralthuam leh venhimna lama tun aia nasaa thawhdun dan tur an sawi nghal bawk a ni.
G20 summit hi kum hmasa lam khan India chuan hneh taka lo thleng tawhin, state hrang hrangah inhmuhkhawmna hman a ni a, Brazil-ah hian ram hrang hrang hruaitute chuan inpawhtawnna tha zawk an neih theihna tura inkawmna hun remchang zawngin, an nei hlawm bawk a ni.
G20 summit-a tel Modi-a’n ram hrang hrang hruaitute kawm
