Tun kara Group of Seven (G7) summit neih a nih dawn mek laiin Geneva-ah lungawi lohna lantirin mi sang tam takin an pungkhawm a, summit hian US President Donald Trump-a leh khawvel ram hruaitu lawk tak takte chu a bul hnaia France-ah an thukhawm dawn a ni.
Pathiannia nawrh huaihawt hi ‘No-G7’ tia sawi, pawl 60 chuang zet inzawm khawm an ni a, Palestinian dikna chanvo humhalh duhtu te, hmeichhiate tana thawk leh khuarel humhalh duhtu te pawh an tel.
“An indo va, hmun tinah indona an siam a. Hei vang hian Pu Trump-a policy leh politic hi kan hlau a, G7 hruaitu dangte pawh kan hlau a ni,” tiin tangrual pawl thupuangtu, Francoise Nyffeler chuan a sawi.
“Kan awmna khawvel hi dinhmun derthawngah a ding a, hei hi kan hlau hle a, khawvel mipuite hian an policy an dodal tih lan nan duh lohna kan lantir a ni,” a ti.
Swiss leh France thuneitute chuan ni thum awh tur summit neih turah hian venhim hna thawk turin police sang tel an dah a, Thawhtanni atang khan French resort khawpui, Evian-les-Bains-ah neih a ni.
Thuneitute chuan kawngpui sirah an dang a, phalna nei lo pun khawm an khap a, buaina tuartu sumdawngte chu zangnadawmna pek an tiam.
Sumdawnna leh dawr tam tak chuan fimkhur nan thing hmangin an dawr hma lam an dang a, kum 2003-a Evian-a summit ang chi neih tumin Geneva-a chhiatna thleng hnuhma a awm avangin buaina a chhuak nasa hle.
Geneva-a nawrh huaihawttute chuan G7 chu ‘mi hausa zawkte tihausa zeltu leh retheite tirethei zual zeltu’ niin an sawi a ni.
US, Canada, Japan, France, Germany, Italy leh United Kingdom telna, G7 hi dikna chungchangah pawh sawi a lo hlawh tawh thin.
He pawl hi khawvel sum thawh chhuah 70% neitu an ni thin a, tunah hian 40% velah a tlahniam tawh a, khawvel mihring hmun 10-a thena hmun khat vel chauh awmna ram an ni thung.
G7 summit-ah hian nawrh huaihawt fo a nih laiin, kuminah pawh hian Trump-a kaihhruainain tariff, US leh Israel indona, leh boruak chhiatna ang chi thil hrang hranga a kaihhruaina avanga khawvel pum huapa lungawi lohna a awm lai a ni.
G7 summit hmain mi sang telin lungawi lohna lantir
