Congress party hruaitu, Rahul Gandhi-a chuan Inrinni hian Madhya Pradesh-a Indore a tlawh dawn a, tun hnaia tui in tur thianghlim lo in avanga chhiatna thleng tuartu chhungkuate a tlawh nghal dawn niin an party chuan a puang.
Madhya Pradesh State Congress pawhin Gandhi-a’n an state a tlawh tur thu h X-ah an tar lang.
Sorkar chuan tun hnai khan Bhagirathpura-a tui in tur thianghlim lo in atanga darh, luak leh kawthalo avangin mi paruk an thi niin an sawi a. Tual chhung mite erawh chuan thi zat hi 23 niin an sawi ve thung.
Sorkar leh tual chhung miten thi zat an sawi inang lo karah hian Mahatma Gandhi Memorial Medical College-a committee-in death audit report a tihchhuahah chuan luak leh kawthalo vang kaihhnawihah hian mi 15 an thi niin a sawi ve thung bawk.
Chief Minister Mohan Yadav-a chuan tui in tur thianghlim lo atanga darh natna leng leh thihna thleng hi eptuten a tuartute lainatna nei tak tak si lovin sorkar mawhchhiata politic khelh nan an hmang niin a sawi.
Gandhi-a hian Indore a tlawhnaah hian he thil thleng tuartu chhungkuate hi a tlawh kual dawn a, an dinhmun leh an tawrhnate a sawipuiin a ngaihthlaksak dawn a ni.
Gandhi-a’n tui thianghlim lo vanga thi chhungte tlawh dawn
