Mizoramah ruihhlo a hluar a, heroin bakah ruihhlo chi dang pawh man tur a tam. Ganja pawh a hluar a, kuminah pawh an man hnem leh tawh.
Mizoram Excise & Narcotics (MEN) department-in kuminah September thlengin ganja hi kg 198.853 an man tawh a, a tam leh tawh khawp mai.
2022-ah khan kum tluanin kg 152.214 an man a, 2023-ah kg 179.233 an man. 2022 leh 2023 tea kum tluana an man aiin kumina thla kaw chhunga an man hi a tam zawk. Police-in 2022-ah kg 129.825 an man a, 2023-ah kg 112.943 an man. Chung aia tam chu kuminah MEN department-in an man tawh.
Tun hnaiah ganja hi a hluar a, 2024-ah khan an man hnem hle; MEN department-in kg 578.592 an man a, police-in kg 305.378 an man.
MEN department hotute chuan ganja hi tunlaiin thalai zingah a zu an pung tih an sawi a, thil sual tiah pawh inngai lova meizial zuka zu mai an awm tih an sawi.
Heroin leh ruihhlo lar zual a awm a, damdawi pawh an man deuh reng; alprazolam mum 29,637 an man tawh a, nitrazepam mum 6865 leh tramadol mum 2350 an man tawh.
Pseudo ephedrin pawh an la man a, kuminah September thla thlengin kg 7.042 an man. Pseudo ephedrin hi a hluar tawh lo a, tun hnaiah a hma angin an man vak tawh lo. Kumina an man pawh hi a tlem rih khawp mai.
MEN department hian ruihhlo vangin kuminah mi 5525 an man tawh a, lirthei 109 an man tawh bawk.
Ganja a hluar, an man hnem tawh
