Mizoramah ganja a hluar a, kum hmasa lamah pawh a hluar tawh an ti. A tam a ni ang, kuminah pawh an man hnem leh tawh.
Mizoram Excise & Narcotics (MEN) department-in kuminah July ni 23 thleng khan ganja hi kg 137.381 an man a, a tam tham khawp mai. Nikum khan kum tluanin kg 189.243 an man a, kumin thla sarih tling lo deuhva an man zat nen a inthlau vak lo.
Kum hmasa lamah ganja hi a hluar tawh a, 2024 khan kg 578.592 lai mai an man. 2024 hi ganja an man tam ber kum a ni.
MEN department hotute’n ganja a hluar thu hi an sawi a, tleirawl, kum lama la naupang lamin an uar tih an sawi.
Ganja lakna kawng a inthlak tih an sawi a, a hma chuan Manipur atanga lakluh a ni tlangpui a, tunah chuan Meghalaya leh Tripura atanga lakluh a nih tawh thu an sawi.
Shillong atanga lut a tam thu an sawi a, bawngsa leh thil dang, Shillong atanga Aizawla thawn thinte’n an thil thawn karah ganja hi an dah a, chutiang chu an man hnem tih an sawi a ni. Tripura atanga lut a tam thu pawh an sawi a, uluk taka fun/tuam a rawn lut nasa an ti.
MEN hotute chuan ganja hi do a tul thu an sawi a, nu leh pate’n an fate an thlithlai a ngaih thu leh ganja hlauhawmzia inhrilh a ngaih thu te an sawi a, khawtlangah pawh ganja that lohna lam sawi uar a tul thu an sawi.
Ganja a hluar, kuminah man hnem leh tawh
