Tun lai hian eirawngbawlna gas tihchingpen a hluar leh a. Central YMA Kumpuan Committee chuan Khamrang, Kawnpui leh a chheh velah eirawngbawlna gas tihchingpen lai an man tih thuthar hriat tur a awm leh ta.
Eirawngbawlna gas tihchingpen hi tunhma atanga buaipui hlawh tawh a ni a, vawi tam tak gas tichingpen lai pawh manchhuah a lo ni tawh thin a; mahse tun thlengin he thil chin tha lo hi a la reh thei lo.
Dik lo taka gas tihchingpen chingte hi, an thiltih lai manchhuah tuma veh reng hi a hautakin a hahthlak hle a. Tunah pawh hian a manchhuak turin YMA Kumpuan Committee chu an tlaivar a ngai a, tha leh zung, sum leh pai leh hun tam tak senral a ngai a, a hautak hle a ni.
Kan hre zing tawh hle ang a, Legal Metrology lam pawhin gas buk dik tak mipuiin an lak theih nan gas bukna tur spring balance/weighing scale chu keng tel zel turin gas semtute a hriattir a, chumi rualin mipuite pawh, gas an lak dawnin ‘buknaa buk thlap’ turin a hriattir nghal bawk. Hei hi chu mi tinin kan hre theuh awm e.
Mahse, gas semna hmuna gas buk thlip thlep thei hi an awm lo a tih theih hial awm e. An lo awm a nih pawhin 1% pawh an tling kher lovang.
Aizawl khawpui chhungah hian home/door delivery kalpui theih lohna hi a tam zawk daih a la ni a. Hengah te hian gas sem a nih dawn chuan aurinna hmang te, social media (Whatsapp) kaltlangin puanzar a ni a. Gas semtuten an semna tur point an thlen hun tur hi bituk a awm ngai loh avangin kawngsirah hun rei tak tak intlar a ngai a. Darkar hnih thum nghah hnua gas phurtu lirthei a lo thlen hi chuan, hmanhmawhna rilru nen, ‘bukna’ lam hi chu a lang leh tawh ngai lo. Tin, gas phurtute pawhin spring balance an phur tel a nih pawhin, an khai chhuak ngai mang lo.
Kan hetih vangte pawh hi a ni ang e, gas agency lam pawh an inthlahdah phah a, chu chuan gas phur truck driver-te tan dik lo taka thil tih duhna kawng a hawng zau sawt a, kan heti ta nuaih hi ni berin a lang.
Mipui hi taima ila, gas te hi buk thlip thlep peih ila, a tlin lohna kha a man atanga paih (cut) zel tur a nih avangin leh, chu chu gas agency lamin an chawi zel a ngaih dawn avangin, gas agency lam pawhin an fimkhur phah ang a, gas phur truck driver-te pawhin thil dik lo an tih thin chu an chin chhunzawm reng thei hauh bikin a rinawmloh a ni.
Gas tihchingpen ven nan mipui taimak a tul
