Montreal khawpuia Canadian Open khelh mekah Inrinni khan champion tura rinkai zinga mi leh top seed ni bawk Coco Gauff chu quarter-final thleng pha lo zawngin a tawp a, American mihang vaw tlatu hi tu dang ni loin tualchhung tleirawl kum 18 mi lek Victoria Mboko niin, kumina WTA ranking lama 280-na kai pha ve chauh a ni!
Canadian mihang tleirawl hi ranking lama a chim chin atang chuan main draw khel pha lo tur ni mah se tualchhung player nih manah ‘wildcard entry’ pek a ni a, Gauff lakah hian chak tura beisei a ni lo hrim hrim a, mahse, minute 62 lek chhungin two-time Grand Slam champion lakah hian 6-1 6-4 hnehna a chang nawlh a, WTA 1000 event last eight a thlen vawi khatna a nih rualin a career-a a hnehna sual chhuah lian ber a ni nghal.
Mboko hian world number 333-na ni chungin kumin kum bul a tan a, second-tier ITF Tour-a title panga a lak tawhna kawngah set hloh eih lo leh a zawn zat ni bawkin match 22 a chak tawh a; Canadian Open-ahhian world number 85-na daih ni chungin inlan mah se major title pahnih la tawh Gauff a barakhaih a, vawiina ranking thar tarchhuah leh turah world number 53-na a luah chho dawrh tawh ang.
Montreal khaw tournament semi-final luh inchuh match pakhatah Mboko hian Jessica Bouzas Maneiro a hmachhawn dawn a, Maneiro hi Mboko aiin ranking-ah step hnihin a sang.
Mboko hmachhawn tur Spaniard Maneiro hian amah ang bawka unseeded player Lin Zhu of China chu inkhel dangah a hneh.
Gauff hi serve-ah a buai leh tlat a, Mboko lakah pawh double fault vawi ruk ngawt neiin, tournament chhunga match thum a khelhah double fault vawi 43 a nei tling.
A hneh loh chungchang sawiin Gauff chuan, “Tour-ah hlawhtlinna tam tak a chan chhoh ngei ka beisei a, kan hmalamah hian vawi duai lo kan la intawn leh ngei pawh ka ring nghet tlat a ni,” a ti.
Inkhel dangah second seed Iga Swiatek chuan last 16 lut turin Eva Lys lakah 6-2 6-2 hnehna a chang.
Fourth-round match-ah vek ninth seed Elena Rybakina chuan Dayana Yastremska lakah 5-7, 6-2, 7-5 hnehna changin, a tum leh tur Ukrainian ve bawk 24th seed Marta Kostyuk chuan set khatna hloh zet chungin American McCartney Kessler lakah 5-7, 6-3, 6-3 hnehna a changlet.
Tarlan tawh thin angin, Canadian Open hmeichhe inelna bik hi Montreal lama an khelh laiin mipa inelna hi Toronto khawpuia khelh a ni ve thung a; men’s singles match pakhatah kum 20 mi leka upa Alex Michelsen chuan 6-3, 6-3-a American Learner Tien hnehin a career-a a vawikhatna atan Masters 1000 event quarter-final a lut.
Seeded 26th Michelsen hian hlap na zet 11th seed Karen Khachanov of Russia a tum leh dawn a; Russian hian last eight lut turin chak zawk tura rinkai eighth seed Casper Ruud chu fourth round match pakhatah 6-4, 7-5-in a barakhaih.
Khachanov hi he tournament-a tum hnih semi-final lut tawh niin, s of the tournament, lost to Michelsen in their only prior meeting.
Top seed Alexander Zverev erawh a tumpui tur Francisco Cerundolo a inlan loh avangin inkhel hah lo walkover-in quarter-final a lut.
Thla hmasa maia Washington Open title latu Alex de Minaur pawh walkover bawkin a tlang a, a chipui Australian Christopher O’Connell a inlan loh avangin thlan tla loin quarter-final a lut.
Ninth seed De Minaur hian seventh-seeded American Frances Tiafoe a hmachhawn leh ang.
Fifth seed Holger Rune pawhin set hmasa ber la zet mah se a hmahruaina a chhunzawm thei lo a, 6-4 2-6 3-6-in Australian Alexei Popyrin lakah a tlawm.
