Aizawl tui chawmtu lakna bera harsatna awm chu tihfel ala nih loh avangin nidanga tui pump theih zat ang pump a la ni lo.
Kumin May 28-a Cyclone Remal-in Aizawl khawpui tana tui lakna hrang hrang a tihchhiat tungding leh turin ngawrh taka hna thawh zel a ni tih PHE department hotute hotute chuan an sawi a. Tlawng tui dawtna hnawh thenfai hna a la kal zel tih a sawi.
Greater Aizawl Water Supply Scheme Phase II chu dan pangngaia tui pump theih turin siamrem a ni tawh a. GAWSS Phase-I chu Tlawng tui a dawtna la tha thei lo mah se, Phase-II atanga pek thlakna tur ruahmanin, Phase-I pawhin khingbai takin tui a pump chhuak ve leh thei tawh. Chutihlaiin ruah tam zual laia tui nu lutuk thin chuan lei nawi leh bawlhhlawh tam tak, pump-in tui a dawtnaah a rawn chhek luh zel avangin, chu’ng bawlhhlawh tihfai nan chuan nitin hun engemawzat sen reng a la ngai a. Hei vang hian nikhata tui pump theih hun chhung a tam theilo tih an sawi.
‘Nitina tui litre maktaduai 30 vel pump thin khan, tunah Phase I & II atangin nikhatah tui litre mtd. 16 vel chauh a pump chhuak thei a. Tui nut zual chang phei chuan hei pawh hi a phak thei thin lo,’ PHED hotute chuan an ti.
Phase III (SIPMIU), nitina mtd.10 pump thin erawh, tui pump thuaivirtu electric motor chu phaia siam a la nih avangin tun thlengin tui a la pump theih rih loh tih an sawi.
Tui awm thei ang ang chu June thla chhung khan semrual a ni a. Veng thenkhat, tui la dawng ve lo te chu July thlaa pek hmasak ber tura ruahman a ni tih an sawi a. Mipui dawhtheihna leh hriatthiamnaah lawmthu a sawi a. Ngai awh leh turin thlakhat a la duh dawn avangin tui renchem leh ruahtui khawl zel turin mipui an ngen tih an sawi a ni.
GAWSS I&II in la pump tlem Phase III-in a la pump thei lo
