Palestinian mipui hliam tuar tam tak leh ram dang mi hliam tuar ten indona hmun an chhuahsan theih nan Rafah Border crossing chu Egypt lam atangin Nilaini atang khan kar engemawzat indo a nih hnuah hawn leh a ni.
US President Joe Biden chuan US-Hamas te indona kal zel avangin US mi leh khua leh tui nihna nei kawp mi 74 te chu Ningani khan Gaza Strip atangin Egypt-ah a lakchhuah thu a sawi. Thuthar thehdarhtu te hmaah National Security Council thupuangtu John Kirby chuan Nilaithawhtanni khan sawiin, “US khua leh tui mi 74 leh an chhungte chuan Egypt ramri an thleng. Hei hi nimin lama American mi 5 tlan chhuak ta te nen an ni. A nihna takah chuan US mi lakchhuah tak te hi hei ai hian an tam zawk thei a ni,” tiin a sawi a. Ningani khan ram dangmi za tamtakin Gaza hi an chhuahsan a ni.
Egypt chuan Rafah Crossing kaltlanga foreigners mi 7,000 chuang te lo tanpui dan tur ruahmanna kan siam a, Palestinian ramri bula duty thupuangtu chuan Ningani khan mi 100 bawr velin Gaza an rawn chhuahsan theih thu a sawi.
Ningani khan United Nations-mandated human rights experts chuan, “Riltam leh manganna te avanga tualthahna thleng thut thei leh mihring mamawh hrang hrang tlakchham avanga harsatna leh buaina vawrtawp Gaza hmunah hian thleng thei reng a ni a, hei hi pumpelh tura chet lak a hun hle a ni,” tiin an sawi. Heng mithiamte zingah hian Palestinian ram chhunga khawsa chanchinthar report tute pawh an tel a ni. “Palestinian mipuite chu ei tur leh mamawh an tlakchham avanga mangang-in an mahni pawh insuat duh mai dinhmunah an ding tawh tih kan hria a ni,” tiin Experts te chuan thuchhuah intawm an siam a. “Tun hun hi chet hun chu a ni. Israel leh a thawhpui ram te pawhin mawhphurhna an nei a, hma lam huna buaina manganthlak tak pumpelh turin tuna chetlak hi a ngai a ni,” tiin an sawi. Hamas-ho enkawl health ministry chuan indona a chhuah atangin mi 9,000 aia tamin nunna an chan tawh thu a sawi a ni. UN aiawh mithiamte chuan mipui pawisawilo hrenbeh reng te chu a rang lama chhuah vat turin an ngen a. “Mipui mamawh leh chakkhai inpek na hun atan liau liau inkahhai puan hi a tul a ni. Inkahhai han tih hian a awmzia chu mipui nunau pawisawilo hrenbeh ten he hmun an chhuahsan theihna hun siam hi a ni,” tiin experts te chuan an sawi.
Gaza a\angin American 74 chhuak : Joe Biden
