Gaza City lak tum Israel-in nasa takin bei chhunzawm

Gaza City lak tum Israel-in nasa takin bei chhunzawm
Israel-in Gaza Strip-a khawpui lian ber, Gaza City lak tumna kal zelah thlawhna leh tank hmangin nasa takin a bei leh.
Mi chengte chuan khawpui hmar lam leh khawchhak lamah chhim lo chat lovin thil puak ri a awm tih an sawi.
Hmar lama Jabalia-a regugee camp pawh Israeli sipaiten an tichhe bawk.
Darkar 24 liam ta chhungin Israeli-te beihna avang hian mi 64 thi lehin mi 300 dawnin hliam an tuar niin Hamas health ministry chuan a sawi.
Israel-in Hamas chhut chimih tuma Gaza a beihnaah hian mi 62,686 an thi ta a, mi 1,57,951-in hliam an tuar tawh bawk.
Israel-a sipaite hian Hamas-in October 7, 2023-a an ram beia mi 1,200 chuang an thah leh hren tura mi 251 an hruai hnuah Gaza hi an bei tan a ni.
Prime Minister Benjamin Netanyahu chuan Hamas hneh a tum hle a, ram dangten indona huang zauhva Gaza City hneh a tum chu an sawisel nasa hle.
Khawpui lak tuma beihnaah hian sipai reserse 60,000 an ko a ni.
Thapui tak tak an la chhuah lo chungin Gaza City hi an chhu nasa hle tawh a, Zeitoun leh Shejayia bawr chu Inrinni zan zankhua khan beiin Sabra pawh tank-in an kap nasa hle bawk.
Israel Defence Forces (IDF) chuan an sipaite hi ni rei vak lo liam ta khan Jabalia-ah an kir leh tih an sawi bawk.
Hetih lai hian Pathianni khan World Health Organization (WHO) chuan July 21-a IDF-in an man an staff chu chhuah a ni tih an sawi a. Tunge a nih leh engvanga man nge tih erawh an sawi lo.
Netanyahu-a chu an ramah pawh nawrtu a tawng nasa hle a, a bik takin mi hren chhungte atangin a tawng nasa zual a, mi hrente chu hruai haw ngei an phut.
Gaza-a Hamas-in an la hren mek 50 zinga 20 chauh an dam tawh nia ngaih a ni.
Thla hmasaa Hamas nena inkahhai leh mi hren chhuah chungchanga an inbiak lehna a tlawlh hnuah Israeli prime minister hian Gaza Strip hneha awp hi a awn tan a ni.
Palai, Qatar leh Egypt chuan ni 60 inkahhaia mi hren 50 zinga a zahve chhuah chu Hamas-in an pawm tih an sawi a. Israeli thuneituten vawi khata mi hren chhuah vek an phut a, an pawm thei lo thung.