Gaza City luah tum Israel-in boruak atangin nasa takin a bei

Gaza City luah tum Israel-in boruak atangin nasa takin a bei
Hamas hnuaia civil defence agency chuan nasa takin Gaza City chu thlawhna atanga kah a ni tih sawiin Israeli sipaiten luah tumin hma a la mek zel.
Thupuangtu, Mahmud Bassal-a chuan mihring chenna, Zeitoun leh Sabra chu ni thum chhung bomb leh drone hmanga beih a ni tih sawiin civil mite in tam tak a chhia a, mi chengten thi leh hliam pawh an la chhuak thei lo tih a sawi.
Israeli war cabinet chuan Thawhtanni khan Gaza City luah turin thu a titlu a, tlai lama UN Security Council thukhawm chuan hei hi na takin do nghal mah se Thawhlehni khan Israel Defense Forces (IDF) chuan ‘ral beih dan thar an tan’ tih an puang zui.
Israeli sorkar hian engtikah nge an sipaiten khawpui hi an luh dawn tih an sawi lo va. Pathianni khan Prime Minister Benjamin Netanyahu-a chuan a sipaite chu Gaza City-a ‘Hamas la inkulh thatna pahnih’ leh khawpui lailia al-Mawasi vel chhu chhe turin thu a pe.
Thuang thuma Gaza-a puihna luhtir dan tur ruahman thar a puang bawk a, heng zingah hian puihna sem tur phurh luhna tur kawng him bik siam leh Israeli sipai leh an thawhpuiten thlawhna atanga puihna tam zawk thlak a tel.
Gaza City-a chengte chuan chawl lovin chung lam atanga beih an ni tih an sawi a. Hamas health ministry chuan darkar 24 liam ta chhungin Gaza damdawi inah thi 100 phurh luh a nih thu leh heng zinga 31 hi puihna semna bula thah an ni tih an sawi a. Ei tur neih loh vangin mi panga an thi bawk niin an sawi.
Hamas nen thla 22 an indo tawh chhungin Israel hian dem a hlawh hle a, UN-in a thlawp mi thiamte chuan tam a tla nasa niin an sawi.
Thawhlehni khan khawvel ram hruaitu lo ni tawhte pawl, ‘The Elders’ tia an sawite chuan Gaza-a indona chu ‘hnam pum suatna’ tia sawiin Israel chu mi chengte tama a dah avangin an dem.
New Zealand prime minister hlui, Helen Clark leh Ireland president hlui, Mary Robinson te chuan Gaza ramri an tlawh hnuah thuchhuah intawm an siam a. Israel-a mihring dikna chanvo humhalhtu pawlte pawhin an ram hian ‘Gaza Strip-a Palestinian-te suat a tum’ tih an lo sawi tawh bawk.
Israel erawh chuan heng puhna hi phain civil mi an tum lo va, mi firfiakte chauh an tum a ni tih an sawi a. Gaza tawrhna chu Hamas vang niin an sawi bawk.
Israel hian October 7, 2023-a Hamas-in an ram chhim lam beia mi 1,200 chuang an thata hren tura mi 251 an hruai phuba lain Gaza an bei a. Palestinian 61,599 vel thi an awm tawh niin health ministry chuan a sawi.