Israel-in Gaza Strip a beih atanga ni 1,000 a tling ta a hmun 90% chuang tihchhiat a ni a, Israeli sipaite chuan an beih ram hi 80% an thunun mek niin thuneituten an sawi.
Gaza-a Government Media Office chuan Ningani khan October 7, 2023 atanga Israel-in indona a kalpui atangin Palestinian 73,066 vel an thi tawh tih a sawi.
Gaza-a thi zinga 21,500 chuang chu naupang an ni a, naute 1,022 an tel tih bawk a. Mi 9,500 chin hriat loh an awm a, mi tam tak chu thil chim chhe hnuaiah an awm rin a ni a, mi 173,514-in hliam an tuar tawh bawk.
Indo lai khan Israel-in Gaza-ah bomb ton 2,23,000 vel thlak a ni tih a sawi – hei hi kum 1945-a Japan khawpui, Hiroshima-a US-in atom bomb a thlak aiin a let 16-in a tam tawh zawk.
Gaza-a hmun tam zawk a chhia a, buaina tihtawp tuma ‘inkahhai’ ruangam hnuaiah body din ni tawh mah se thla ruk chhungin tih an la nei mang lo.
US-in Board of Peace a siam hi January khan UN Security Council-in a pawmpui a, thawh thuma kalpui tura duan a ni a. Board hian sum tluklehdingawn tel dawng tura intiamna awm mah se pawisa a nei rih lo.
Nikum October thlaa inkahhai puan a nih atang khan Israeli sipaite hian Palestinian 1,000 chuang an that leh tawh bawk.
Gaza mipuite chu riltama thih mai hlauhawm takin an awm a, ni khatah chaw vawi khat ei mi 4,00,000 vel an ni a, damdawi tul zual ang chi chu 62% a awm tawh lo va. UN chuan Gaza-a mihring dinhmun chu kum 77-in a hnungtawlh thu sawiin dam rei zawng pawh kum 40-ah a tlahniam tih a sawi.
Indona avanga thil chhia tlingkhawm chu ton maktaduai 68 vel nia chhut a ni a. UN-in a tar lan dan chuan ton 3,10,000 vel, 0.5% pawh tling lo chauh then fel a la ni a, hetiang a nih chuan kum 140 chuang hun a la ngai dawn a ni.
“Kan ei dapna, kan in leh kan hmunhma 85-90% vel kan hloh a, thil tam tak che thei lovin a awm a ni,” tiin Gaza City Mayor Yahya al-Sarraj chuan a sawi.
Israeli Finance Minister Bezalel Smotrich chuan Thawhtanni tlaia chhim lam khawpui, Sderot Mayor Alon Davidi nena an inkawmnaah, “Hmun la awmte hi kan lak zawh a ngai a, Hamas kan hneh a ngai a, Juda chenna hmun kan din a ngai a, hei hian Sderot leh Gaza ramria awmte tana venhimna a ni ang,” a ti.
Ningani khan Israel-ah Hamas kaihhruaiin October 7, 2023-a Israel chhim lam an beih atanga ni 1,000-na pualin hriatrengna hun hman a ni.
October Council huaihawtin ram pumah lungawi lohna beih a ni a. Israeli sorkar chu beih an tawha venhimna a hlawhchham dan chhui tha duh lovah an puh.
October 7, 2023 atang khan Israeli 5,000 vel chu Gaza bula chhim lam bialah an insawn tawh niin The Times of Israel chuan a tar lang.
Indo tan hma khan mi 62,000 vel an awm a. Mi 90% vel chu an kir leh tawh a, Israel sorkar chuan kum 2030-ah chuan mi 1,24,000 vel awmtir a tum.
GAZA INDO: Ni 1,000 tling, Gaza Strip 90% chuang chhia
