Gaza luh tum activist mante Israel-in thawn haw tum
Swedish campaigner Greta Thunberg-i tela activist rual, puihna thil phura lawnga Gaza an pan lai mante chu Tel Aviv tumhmunah thawn haw turin hruai an ni tih Israel-in Thawhlehni khan a sawi
Mi 12 chuanna yacht hi Gaza-a chengte puihna pe tura kal an ni a, Thawhtanni hma taka Israeli sipaiten an man hnuah Israeli lawngchawlhna khawpui, Ashdod-ah Thawhtanni chawhnu khan hnuh thlen an ni.
Israel chuan a chuangte hi an ramah theuh hawtir turin Ben Gurion Airport thlenpui an ni tawh tih a sawi.
“Thawn chhuah tura tihna lehkhaa hming ziak duh lo leh haw duh lo chu dan angin thuneitute hmaah inlantir an ni ang,” tiin Israeli foreign ministry chuan X-ah a tar lang.
Lawng enkawltu, activist pawl, Freedom Flotilla Coalition (FFC) chuan campaigner-te hi ‘dan anga an chunga thil tih a nih hnuah Israeli thuneitute kutah an awm’ tih a sawi a. “Zanin thim hlimah Tel Aviv an chhuahsan theih a rinawm,” tih social media-ah an tar lang.
A huaihawttute chuan Madleen hi Israel-in tuipui atanga luhna a dan vek paltlanga Gaza-a puihna luhpui tum a ni tih an sawi a. Tu tuipui mah ni lovah Israeli sipaiten an nangching tih an sawi.
Madleen-in puihna a phurh zingah hian buhfai leh naute thilte a tel niin FFC chuan a sawi.
Lawngah hian Brazil, France, Germany, Netherlands, Spain, Sweden leh Turkey mite an chuang a. An zinga pakhat hi European Parliament member Rima Hassan a ni a, Al Jazeera-a thawk chanchinbumi, Omar Faiad a tel bawk.
June 1 khan Italy chhuahsanin Gaza-a puih ngai tak takte dinhmun puanzar tur leh puihna pe turin an kal a ni.
Israel chuan Gaza luhna an dan hi Hamas fighter-ten ralthuam an chawk luhna danna atana tih ngei ngai niin a sawi.
Pathianni khan Israeli Defence Minister Israel Katz chuan an dan bawhchhiat tumte chu a vaukhan a. Hetih lai hian FFC chuan tuipui dan chu dan lo a ti ve thung.
Kum 2010 khan Israeli commando-ten Gaza-a puihna pek tum Turkish lawng Mavi Marmara-a chuang Turkish activist 10 an lo that tawh.
Israel hian thla thum chhung khawmuala Gaza luhna a dan hnuah a hawng tan a, Gaza Humanitarian Foundation kaltlangin puihna a sem tan.
October 7, 2023-a Gaza-a Hamas-ten Israel luhchilha mi 1m299 chuang an thah leh hren tura mi 251 an hruai hnua indona chhuak hian thla 20 a awh ta a. Gaza-ah hian mi 54,880 an thi tawh niin Hamas health ministry chuan a sawi.
Gaza luh tum activist mante Israel-in thawn haw tum
