Kum 2025 intan atanga India rama nau piang hmasa ber Frankie Lalremruatdika Zadeng kum khat tlin lawmna chu January 1 khan Aizawlah a pian champha lawm a ni a. Chief minister Lalduhoma’n a hmanpui.
Hun chhuta chumi anga chhuan hrang hrang siamtute chuan kum 2025 hnulam chu chhuan thar, ‘Generation Beta’ an ti a. Chumi atanga chhiara India ram puma nau piang hmasa ber nia chhinchhiah chu Aizawl KhatlaEast Veng ami, ZD Remruatsanga leh Ramnunziri te fapa Frankie Lalremruatdika Zadeng hi a ni a. 2025 January 1 zing dar 12.03 ah Synod Hospital Durtlangah a piang a ni.
2026 January 1 khan a kum khat tlin lawm a ni a. Hmanpuitu chief minister chuan, kum 2025-a India ram puma nau piang hmasa ber, chhuan thar, a hming atana Beta chhuan thar (Generation Beta) an tih mai Mizoram-in a nei chu a lawmawm dangdai hle tih a sawi a. A kum khatna an lawm chu hlu a ti a, hrisel taka thanglian zel turin duhsakna a hlan tih a sawi a ni.
Hetihlai hian kum 2026-a Aizawl bika nau piang hmasa ber chu Aizawl Khatla Veng ami, Vanlalhlana leh Zodinsangi te fanu a ni a, January 1 zing dar 12.05 ah Civil Hospital Aizawlah a piang. Hemi zing dar 12.12 khan Cindy Lalmalsawmi, Ngopa pawhin BN Hospital Kulikawn Aizawlah fapa a hring ve bawk.
Generation Beta nau piang hmasa ber piancham lawm
