Inrinni zan khan German Bundesluga 2022-23 khelh zawh a ni a. Champion thar ni ngei tura ngaih Borussia Dortmund an chak zawh loh vangin Bayern Munich chu mak tak maiin an champion leh a, season 11 chhung zet champion zawn tawhim Bayern hi German-ah an vawk lal len chhunzawm zel.
Dormund tan a na lua e!
German Bundesliga 2022-23 tawp nan khelh khat chauh khelh hmabak a awm thlengin Borussia Dortmund in point hnihin champion lai Bayern Munich lakah hma an hruai fal a. Dortmund hi an muala Mainz hmachhawn tur an nih vangin champion thar ni ngei tura ngaih an ni. Champion lawm tumin Signal Iduna Park-ah mipui pawh an pungkhawm hnem hle a. Hnehna hlado chham tuma pungkhawm mipui sing telte chu an champion zawh loh vangin lungchhe takin an tap ta zawk.
Champions thar ni tura an mualah chak ngei mamawh Dortmund hian beisei phak lo takin bul an tan a, hma takah goal hnih an chhuah hmasa. 11-naa awm mek Maiz laka an si phur sut zo bawk mah se inkhel dangah Bayern Munich an lo chak ve bawk si vangin uiawm takin an champion zo lo.
Signal Iduna Park-a lenglut Mainz hian bul an tan tha viau a, minute 15-na lekah Andreas Hanche-Olsen chuan Fernandes siamsak atangin hmahruaina goal a thun. Hma taka goal an chhuah hi sut thuai tumin Dortmund in tan an khawh a, an khingpuite an nawr na hle. An si phurh sut ngei tuma tan an khawh laiin goal chhuah hmasa zawkah an tang zui leh tlat pek a, minute 24-na lekah Karim Onisiwo chuanLee Jae-sung siamsak tha tak chu goal-ah a chantir a, an goal hnihna a thun. Heng goal hnihte hian champion chaka tuihal Dortmund a ti hrilhhai hle a, an mualah chak zawh loh hlauin an thaw dep dep. Mualneitu Dortmund hian an si phurh sut tum viau mah se chawlhlawk hmain goal an thun thei lova, si hnih faia hnufual chungin chawlhlawk an hmang.
Chawlhlawk hnu lamah Dortmund in an si phurh sut tumin tan an khawh nasa lehzual a, champion an beiseina tisang lehzual turin goal hnih an thun ta nge nge. Minute 69-naah Raphaël Guerreiro chuan Reyna siamsak atangin goal a thun a, an si phurh a sut then.
An si phurh an sut then hnuin phu leh tha tho zawkin Dortmund an inlan a, mipui au ring tak nen an mikhualte an nawr na hle. An mikhualte an nawr viau chungin goal erawh an thun belh thei lawk lo thung a, hun pangngai tawp thlengin hnufual zawk an la ni. Hun tawp rak thlengin an mikhual Mainz hi na takin an nawr a, minute 90+6-ah Reyna siamsa atang vekin Niklas Süle chuan goal a thun a, an si phurh a sut zo.
An si phurh an sut zawh hnuin Dortmund hian goal dang thun belh tum viau mah se hun tha dang a nei thei tawh lova, an mualah ngei uiawm takin an chak zo lova, an kuta innghat vek tawh trophy hlutak chu an mahni ngeiin an thlauh a, Bayern Munich kutah bawk a tlu lut leh ta nge nge a ni. An muala chak zo lo Borussia Dortmund leh Mimuala hnehna chang Bayern Munich te hian khelh 34 atangin point 71 ve ve hmu bawk mah se goal diference-a tha zawk Bayern Munich chu chungnung zawkah an tang a, an champion leh ta nge nge a ni.
Bayern bawk
An match hnuhnung berah 1. FC Köln an hmachhawn hma thlenga point hniha an hniam zawk vangin vawi 10 zet champion zawn tawh Bayern Munich rorelna a tawp ve dawn ta nge nge a ngaihna lian tak a awm a. An trophy an hloh ngei tura ngaih Bayern Munich chuan 1. FC Köln lakah hnehna pawimawh tak an sual-chhuak a, a zawna a vawi 11-nan German Bundesliga-ah ropui takin an champion leh ta nge nge.
An trophy kawl mek hloh fel tura ngaih Bayern Munich hi Deutsche Bank Park-ah inringtawk takin an leng-lut a, boruak sang tak hnuaiah chiai hauh lovin an inlan thei a, 2-1 a hnehna changin champion trophy an hlawh-chhuak leh ta hial bawk. Bayern Munich hian Deutsche Bank Park-ah bul an tan tha viau a, minute riatna lekah Leroy Sane siamsak atangin Kingsley Coman chuan hmahruaina goal a thun. Coman goal thun hman hian hun rei tak chhung hma an hruai.
Hun rei tak hnufual zawka an tan hnuin mualneitu 1. FC Köln tan hian minute 81-naah Dejan Ljubicic chuan penalty atangin an si phurh a sut. Hun tawp dawn hnaihah goal an chhuah vangin Bayern Munich tan champion a harsa lehzual tura ngaih a ni. Hun harsa leh khirh takah huaisen takin Thomas Tuchel-a team te an inlan chhunzawm a. Hun tawp dawn tep minute 89-naah Jamal Musiala chuan goal pawimawh zet mai a thun a. Musiala goal thun hmang hian hma an hruai let leh ta chiah. Hun tawp thlengin goal dang a luh belh lova, Bayern Munich chuan champion tura an mamawh point thum an hmu.
J1. FC Köln lakah chak bawk mah se Bayern Munich hi an la champion chiang chuang lova, Borussia Dortmund result-ah an la innghat. Inkhel dangah Dortmund an chak zawh loh vangin champion zo lo tura ngaih ngheh tawh Bayern Munich chu ropui takin an champion leh ta nge nge a ni.
Bundesliga 2022-23 thlir letna
Inrinni zana khelh zawh tak German Bundesliga 2022-23-ah khan inkhel 306 a awm a. Inkhel 306 atangi goal 971 thun a ni a, inkhel tinah goal 3.17 lut zel ang a ni a. Goal 16 ve ve thunNiclas Füllkrug leh
Christopher Nkunku te top-scorer an ni.
Tarlan tawh angin Bundesliga 2022-23 a champion chu Bayern Munich an ni a. Bayern hi Bundesluga-ah vawi 32 zet an champion na a ni. Bayern Munich, Borussia Dortmund, RB Leipzig leh
Union Berlin ten champions league an khel ang a. SC Freiburg in Europa League an khel ve thung ang. Bayern Munich an champion lai hian Schalke 04 leh
Hertha BSC te an tlahniam ve thung.
German Bundesliga 2022-23 a entu mipui zawng zawng kha 13,147,701 an ni a, inkhel pakhatah entu 42,966 awm ang zel a ni.
German champion Bayern Munich
![](https://theaizawlpost.org/wp-content/uploads/2023/05/bayern.jpg)