Germany-ah Bayern an fal zel
Pathianni zanah sili fai ngawta an mikhual Eintracht Frankfurt sawp lehin German Bundesliga hmahruaitu Bayern Munich chuan table-a an hmahruaina an chhung chhah leh sawt a, anmahni hnaihbertu Bayer Leverkusen lakah point riat bawkin hma an hruai fal leh.
Inrinni khan defending champion Leverkusen hian sihnih faia mualneitu Holstein Kiel hnein Bayern nena an inkar chu point ngaah an dah hman ren rawn a, Vincent Kompany leh a naute hian pathumna luahtu Frankfurt sawp chungin table lera an dinhmun chu a ngaiah an sawhnghet zui leh ta a ni.
Allianz Arena chhunga mipui 75,000 fuankhawm hmaah Crystal Palace midfielder hlui Michael Olise chuan first half hun pekbelhah Bayern goal hmahruai a khung a; second half-ah Hiroki Ito, Jamal Musiala leh substitute Serge Gnabry-te’n mualneitu team tan goal khat diat diat an thawhkhawm ve leh a; Zirtawpni zana pasarihna luahtu Stuttgart muala point thum an hmuh leh theih chuan Bayern hian point 11 zeta hmahruai fal theihna hun remchang an nei dawn.
Pathianni zan inkhelah Bavarians lam khan hun pumin inkhel an thunun hneh hle a, first half-ah goal thun harsat bawk mah se second half chu a bu ang thlap a ni a, point 58 hum chungin dinhmun tha takah an ding chhunzawm zel.
Bayern Munich hi a hma kar mai khan tualchhungah an elpui lian ber Leverkusen hneh zo loin draw an nei a; karliamta Thawhlehni Champions League lamah Celtic chu 1-1-in an inhnehtawkpui leh a, tuntuma hnehna an chan tak hnu hian inkhelh ban press conference-ah an coach Kompany chuan boruak sang chho zelah dam dapa an awm zui zel theih a pawimawh tur thu sawi chungin a team-te an hriam telh telha a hriat thu leh a player-te’n hnehna chang tura an riltamzia an pholang nia a ngaih thu a sawi.
First half-a talbuai Bayern khan tum engngemawzat ‘golden chance’ han tih tur nei mah se Leroy Sane thawhrah atanga Olise goal bak lawm tur an nei zo lo!
Thla thar Champions League round of 16 lama Bundesliga club ve tho leh tualchhunga an elpui lian ber ni mek bawk Leverkusen hmachhawn tur Bayern buaina belhchhah turin Joshua Kimmich chu chawlhlawk dawnah hliam avangin lakchhuah a ni a, a hnuah Belgian coach chuan Kimmich-a hliam chu serious lutuk lo tura ngaih a nih thu a saiw.
Tarlan tawh angin, second half zet chu a dan a dang ta zar a, Eintracht Frankfurt goalkeeper Kevin Trapp tan zan lungngaihthlak a ni hawt mai!
Chawlhlawk hnua khelmual lut ve chauh Harry Kane kha chawn tha na atanga dam hlimte a ni bawk a, a goal thun lai hmuh tur a la awm chiah lo a, mahse, khelmuala a kirleh thei ringawt pawh kha Bundesliga hmahruaitu team tan hian lawmna tham a tling ngeiin a rinawm.
Germany-ah Bayern an fal zel
