Germany veltu Paraguay!

Germany veltu Paraguay!
|um li ngawt world champion ni tawh Germany tan 2026 World Cup zinkawng a tawp a, thleng sang leh tura rinkai zinga mai German-ho hnawtchhuaktute hi South American team naran zinga mi Paraguay niin, nimin zing last 32 inkhel pakhatah team pahnih hi extra time khelh zawh thleng 1-1-a an inhnehtawk hnu penalty shootout-ah 4-3-in Paraguay an vannei ta zawk a ni.
Shootout-ah hian Arsenal forward Kai Havertz leh Newcastle United player Nick Woltemade-te chhuih chu Paraguay goalkeeper Orlando Gill chuan dansakin, Paraguay lam pawhin tum hnih bawk an thelh ve tho a; Antonio Sanabria shot chu goal ban sirah chhuakin, Fabian Balbuena pet chu kum 40-a upa ni tawh Manuel Neuer chuan a dansak thung.
Sudden death an thleng a, Germany tana pen chhuak Jonathan Tah chuan goal kham chungah a pet chhuak luah a; chu tah pet goal-a chak thei tawh South American team tan defender Jose Canale chuan a thelh ve duh ta si lo a, rinkai lo zawk Paraguay-in last 16 an lut lel!
A khelh pangngai lamah pawh German-ho hi si phur hmasa an ni ve reng reng a; half time dawn minute 42-ah Premier League lama Brighton leh Ipswich tana lo inlan tawh Julio Enciso chuan beisei loh takin Paraguay hmahruaina goal a thun nawlh ve bawk a!
Second half-ah Germany game a rtawn kang ta hluai a, minute 54 an khelh tlin rualin Kai Havertz chuan Liverpool midfielder Florian Wirtz-a siamsak atangin an siphurh sutna goal a tauhlut.
1-1 a nih hnu hian Paraguay lamin extra time thlen hram tumin tlarhnung an veng hlawhtling a; minute 30 dang hun pekbelhah pawh chuan an hmachhawn dangleh penalty shootout thleng turin defending tha tak an khel chhunzawm leh.
Germany lam hian penalty pui pui thlen ngai loin chakah an inngaio hman a, mahse, Tah-a tauhluh kha an han zirchiang a, kha goal luh lai vela Gill laka Waldemar Anton-a foul an man chhuah avangin Germany hmahruaina goal tur hi chhuhsak a ni a, an lawm lo hle nghe nghe.
Penalty shootout-ah Germany an pen chhuak hmasa a, pet hmasaber Havertz chuan thelh nghal pangin, Woltemade-a goal tur dansak a ni ve leh a; Paraguay lam pawhin an hun tha neih bawhpelhin, vawi hnih bawk an thelh zui ve leh a nih kha.
A tawpah Canale chuan team pahnih inkara danglamna thlentu goal a thun a, round of 16 luh lawmna thawm leh chetla mit la tak thlir turin a zui.
He thu buatsaih lai thleng hian Inrinni Philadelphia khaw last 16 inkhela Paraguay tum tur hi a la chiang lo a, two-time champions France a nih loh chuan 1958 runners-up Sweden an ni ang.
Kumin hi penalty pet hmanga World Cup atanga Germany tlak vawi khatna niin, kum 1954, 1974, 1990 leh 2014 champion hi trophy an lak hnuhnunber atangin tum thum ngawt a zawnin an champion zo ta lo a nih hi!
Kum 2018 phei kha chuan an han chechhe tlawk tlawk khawp a, defending champion ve meuh kha Mexico leh South Korea laka tlawm chungin an group mawngphah an ni a, knock out stage hmasaber an lut zo lo!
Kum 2022-ah pawh chuti leh bawk! Tah kha chuan tlemin an ziaawm ta deuh a, Japan lakah chauh tlawmin an group-ah pathumna ni chungin group stage-ah an duhtawk!
Kuminah hma sawn leh hretin, round of 32 an lut a, mahse, an ngam lohte kha Fifa world ranking-a an aia pen 31 zeta hnia, world number 41-na luahtute an ni a, na ve tak tur a ni!
Paraguay kha an bultanna inkhelah 4-1 ngawtin tournament thlengtu pui ber United States lakah tlawm bawk mah se kha mi hnu khan an head coach Gustavo Alfaro zihlna an zawm tha hle a nih hmel a, an lama goal thun a harsa ta talh a, Group D-a pathumna ni chungin an tlang.
An central defence lama inkawp fuh Canale leh Gustavo Gomez-te’n tlarhnung an enkawl tha a, Germany goal thun tum tan khawh an talbuai fo a; feet 6 leh inchi 6 ngawta sang an goalkeeper Gill kha Paraguay hero a ni bawk.
Tarlan tak angin, Germany hi World Cup penalty shootout an hmachhawn hnuhnung vawi lia damkhawchhuak fai vek an nih avangin nimin zing pawh khan engtin tin emaw an vannei leh mai ang em tih zawhna a pian hman laiin an vanneihnain a tlin zozai bik ta lo a nih kha!
Tunhma lamah pawh major tournament shootout-ah hian vawi khat chiah hlawhchham an la nei a, chu chu 1976 European Championship final-a Czechoslovakia an vanneih zawk tum kha niin, kha mi kum atang khan chakna goal chip luttu Antonin Panenka khan penalty pet dan chi khat hmingthang zet a rawn tichhuak ta a, football khawvelin ‘Panenka penalty’ hming a neih thar phah ta a nih hi!
Boston Stadium-a inkhel entu zat kha an chhinchhiah dan chuan 63,945 an ni a; a hmuna khati zat mipui pungkhawm bakah khawvel mipuiin World Cup-a inbarakhaihna, chak lo zawk tura rin chak zawkna turu berte zinga pakhat kan thlirliam za ho ta a ni.