Girona muala chak nuamsa Real

Girona muala chak nuamsa Real
Sithum faia mualneitu Girona an sawp zanah England midfielder Jude Bellingham bawk goal thun pawlah tang lehin, first half minute 36-a a goal hmahruai tihluh nen a zawnin La Liga game nga chhung goal a thun tling ta a, beisei anga bul a tan fuh tawk loh avangin season kal laia a goal nga khawl tlinna chiah a ni.
Thla hmasa nen inzawma heti zat goal a khung zawn hma hian season kal laiah English player hian a club vawn lai tan goal a thun zo lo a, mahse, kum 2021 March leh April thlaa Karim Benzema ropui hnu lamah Real player zinga a zawna league match vawinga chhung goal thun leh thei hmasaber a rawn ni chho ta a ni.
Bellingham hian second half tir lama Arda Guler goal tur siamsak bawkin, darkar khat a khel tling hlawt tihah Birmingham leh Borussia Dortmund player hlui Bellingham hi hliam tenau avangin Dani Ceballos chuan a thlak ta a ni.
Real Madrid a zawm hnua ‘pressure’ zo loa sawi leh mi thenkhat hlauhthawnpui ang ngeia goal khung dan theihnghilh titih ta deuh tlat Kylian Mbappe pawhin a league goal kuana a puitlin ve leh nawlh a, mipui 13,827 lek punkhawmna Municipal de Montilivi stadium-a Luka Modric siamsak atanga a goal khat tihluh khan inrintawkna pawh a siamsak leh hlek tura ngaih a ni!
Frenchman hian a career-ah club hrang hrang tan belhkhawmin league goal 200 a tilut tling ta a; a hun hmasa lamah Monaco tan goal 16 leh Paris St-Germain tan goal 175 a lo thun tling tawh a ni.
Defending league champion hian Inrinni zan inkhel dangfa Real Betis laka point khat bak hlawhchhuak zoi lo hmahruaitu Barcelona nena an inkar chu poin t hnihah an pawtzim a, Catalan team laka game khata an la khelh tlem zawk bawk avangin Carlo Ancelotti team tan hmahruai theihna ‘chance’ a tha hle a ni.
Kartawp inkhela Bellingham-a hliam tawrh chungchangah Los Blancos head coach Carlo Ancelotti chuan Thawhlehni zan team Champions League-a Atalanta an luhkhung hunah kum 21 mi chu a chhawr theih a beisei thu a sawi.
Real website-in Ancelotti thusawi a tarlan danin, “Bellingham hian game nga chhungin goal nga a khung thei a, a khelh that tluan lai tak niin, a ke a tihtat deuh avangin risk awm thei laka venna’n minute tlemte la awmah lakchhuah a ni a, Thawhlehni atan chuan a inpeih leh nghal ang,” tiin.
Barcelona tawlhtlu leh tawh!
Real Betis kawtkaiah chak thei mai tawh tura ngaih an nih laiin Catalan team-in hun pekbelh minute li a zawh hmain an hmahruaina an hloh a, sihnih ve vea team pahnih inhnehtawkin, Barcelona-in La Liga table-a an hmahruaina derthawng tak an sawhnghet zo lo.
Benito Villamarin stadium-a mipui 51,749 lai pungkhawm hmaah Robert Lewandowski chawn chawlhlawk hnaih tawh lamah mikhual hmahruaina khung mah se second half laihawl thlen chhoh dawn thuakah Giovani Lo Celso chuan penalty atangin mualneitu team siphurh sutna goal a chhuihlut a; hun pangngai tawp hma minute riat la awmah Ferran Torres chuan Barca hmahruai nawnna goal thun ve leh mah se substitute rawlthar kum 19 mi lek Assane Diao chuan Betis tlawm tur chhanin hun pekbelh-a home team point khat hlawhchhuahna goal a khung a, Nou Camp club-in title race an thunun zo lo!
Season bul tan ropui Poland international Lewandowski khan season kal laiah league goal 16 khawl tling der tawhin, inelna dang nen phei chuan belhkhawmin game 21-ah goal 23 a tlilut tling leh hial tawh a ni.
Lamine Yamal chuan kha inkhelah khan goal khung theihna hun remchang a bawhpelh aan hmahruaina tinghet tura chak an mamawhna inkhelah Catalan hoin point hnih an hloh then.
Nilaini zanah Champions League-a Borussia Dortmund khelin Barca hi an chechhuak zui leh dawn a, kartawp Pathianni zan khian La Liga lamah Leganes an tum leh dawn a ni.