Giroud goal ven zanah Milan chak!

Giroud goal ven zanah Milan chak!
Inrinni zanah Serie A hmahruaitu Inter Milan chuan mikhual Bologna laka point hnih an hloh then laiin AC Milan chuan Genoa mualah point thum an hlawhchhuak a, table-ah a ler an luah chho.
He match-ah hian French striker Olivier Gi-roud chuan hun pekbelh minute riatnaa hnawh-chhuah tawk an keeper Mike Maignan hmun luahin minute sarih chhung Milan goal a veng zuai!
Milan match khelh leh hmasakber tura Juventus hmachhawn thei lo tur Maignan hi box pawnah penalty chawi lo zawngin Caleb Ekuban lakah a foul a, video assistant referee-in a chetdan a zirchian hnu-ah referee chuan straight red hmangin a hnawt-chhuak a; bench lama substitute luhtir tur nei tawh lo Milan boss Stefano Pioli chuan kutkawr bun turin Giroud thu a pe a, glove bun hun tawp dawnah save pui tak a lantir a, a hna lamah goal khung zo lo mah se table-a hma an hruai theihna kawngah a thawhhlawk a tih loh theih loh!
Inrinni inkhel dangah hmahruaitu ni chunga bul tan Inter Milan chu an mikhual Bologna nen 2-2-in an inhnehtawk a, chutih laiin Milan chuan an mikhualnaah point thum an thawkchhuak a, khelh riata point 21 hmuin Inter an lehpel a; Serie A table-a a sang pahnih hi point hnihin an inthlau.
Inkhel dangah Juven-tus chuan sihnih faia an mikhual Torino hneh chungin Turin club hian Inrinnia inkhel ve lo Napoli lehpelin pathumna an luah chho ve bawk.
AC Milan chakna goal khungtu kha Christian Puli-sic niin, second half hun pangngai tawp hma minute thum la awmah chakna goal awmchhun a khung.
He match-ah hian Ge-noa keeper Josep Martinez pawh minute 113-naah a tumhnihna atana yellow hmuin hnawhchhuah a ni.
Goal a la luh hma mi-nute 86-ah draw result tlakhlelh vangin Martinez hian tul loah hun a piah a, yellow card hmanga thu-nun niin, hnawhchhuah a tawhna yellow card hnu-hnung zawk erawh Yunus Musah laka a chet dan hlauhawm vang a ni thung.
Tarlan tak angin, Inter chuan an kawtkaiah Bolog-na an hneh zo lo a; he match-ah hian Franceso Acerbi chuan minute 11-na lekah Inter hmahruaina goal khungin, minute hnih a liam leh tihah Lautaro Martinez chuan sihnih faia mualneitu team hma-hruaina goal a thawh ve leh a, season kal laia a league goal 10 thunna ni tawhin, San Siro luahtute kha nuamsaa chak tura ngaih an ni hman.
Bologna lamin ngaih-dan hran daih an lo nei a, sihnih chhuah tawh mah se inpek an lo tum aw-zawng bik lo a, Riccardo Orsolini chuan first half-ah an siphurh pakhat zawk sut thenin, second half tir lam minute 52-ah Joshua Zirkzee chuan Bologna siphurh sut zawhna goal a thawh ve leh a, goal dang luhbelh loin Inter Milan-in an kawtkaiah point hnih an hloh then.
Inrinni Turin derby-a Torino laka Juventus chak-na goal hnih kha second half-a Federico Gatti leh Arkadiusz Milik tihluh niin, table-ah pathumna an luah chho phawt a, hma-hruaitu Milan lakah point liin an la hnufual.