By: Thankima Hmar
Leilung hi Pathian siam a ni a, a chhunga cheng zawng te nen hian. Duat taka a siam chu tunah hian a chhe mek a, a tam zawk chu mihringte tihchhiat a ni lehnghal. Khawvelin chhiatna a tawh mek leh a tawh hma bak lian tak chu khawvel lum zual zel hi a ni, hei hi thil thar pawh a ni tawh lo. A hria apiang an mutui lova, a hre lo apiang an hawi mai mai a, hriatloh vanga tawrh loh chi zia zang a ni hek lo. Kan hmabak thim tak hi bengsika ngaihtuah a ngai ta. Mithiamte an buai ta, chu chu eng nge? Kum 1900 atang khan khawvel lum chhoh dan an en a, chuta a landan chuan khawvel lum dan hi 1 degree F aia tamin a sang a. Kum 1970 atang khan a let thumin a sang tawh lehnghal. Hma lam hun hre rengin engvanga lo sang ta thut nge tih an ngaihtuah a A chhan tam tak zingah mihringten kan siam chawp Greenhouse gas te, lirthei leh thilsiamna lo pung ta lutuk hi a ni tih an hria a. Greenhouse effect hian gas chi khat a pe chhuak a, chu gas chuan ni eng atanga lumna lokal nasa lutuk tur lo dangtu boruak a tichhia a. He gas hi a lo tam zual zel tak avangin ni eng lumna kan dawng nasa tial tial a, chu chuan khua a ti lum nasa tial tial bawk.
Pathianin van boruak a siamah hian boruak chi hrang hrang a tam hle a- Nitrogen (78%), Oxygen (21%), Argon (0.9%), Carbon dioxide (0.03%) leh vaivut nawi tam takin kan chenna khawvel hi a tuam mup a. Heng boruak hrang hrang zinga khawvel ti lumtu ber chu Carbondioxide, a nih tur baka lo tam ta hi a ni. Boruak thianghlim pangngaiah hian Carbon dioxide hi 0.03% – 0.06% vel a awm tlangpui a Mi hrisel pangngai hian 5% (5000ppm) per volume vel kan hiplut thei a ni. Heng bakah hian boruak chi dang Hydrofluarocarbon, perfluorocarbon, sulfurthexafluorone, nitrous oxide, methane, chlorofluorocarbon te pawh hi boruak ti lum zualtute an ni bawk. Sawi tawh angin khawvel changkannain a ken tel thilsiamna lian tak tak te, meikhu tam tak leh henglaia kan lo hal khu tiamin boruakah carbondioxide a pe chhuak nasa hle a, a tam tial tial bawk si avangin khawlum a zual zel a ni. Helam hawi pawl lian tak Intergovernmental Panel on Climate Change (IPCC) chuan a chhut danin, kum 2050-ah chuan khawvel lumna hi 1 degree Celcius atangin 5 degree celcius in a pung chho turah an ngai Tunah hian khawvel lum lam hi chawhrualin 15 degree celcius a ni a, hei aia degree khat lek pawha a lum chuan khawi maw laiah vur tui a awm ngei ngei dawn. Tun aia a lum chuan luipui lumna pawh a danglam ang a, chu chuan a lum lam leh vawh lam nuam tawk chauha khawsa tuipuia nungchate tuallenna a tibuai nasa hle ang. Hei mai a ni lo, kum zabi 21-ah chuan khawvel lumna hi 3-6 degree celcius-in a sang dawn an la ti deuh deuh bawk. Hetih hunah chuan chhim tawp leh hmar tawp vur hi a khal rei tawh lovang.
Khawvel lumna hi a chhan dang a la awm. Carbondioxide tluk bawkin Methane gas hi a hlauhawm hle. Methane gas hi ranvulhna hmun atang te, loneihna hmun leh thlai tawih atang te, thil kang thei lam chi atangtein a insiam a. Ruahtui leh tuilian ten heng hmun a thlen khan leilunga organic matter lo awm kha a tawih a, methane gas a lo insiam ve thin. Tin, thilsiamna hmuna damdawi bawilhlo tam tak kang hian Nitrous oxide lam tak a tichhuak bawk. Anihna takah chuan kan changkanna khawvel hian boruak hi kan ur chhe char char a ni mai a, ram changkang apiang hian an thawhhlawk lehnghal!
Global warming hian mihring tluk bawka a tihbuai hmasak tur chu nungchate a ni tlat. A tir atang rengin khawvela ramngaw leh nungchate hi inbuktawk (ecological balance) taka awm tura duan a ni a. Khawi maw lai a tlem emaw, a tam lutuk chuan a buai vek. Entirnan, rul hi mang ta diak se, sazu an pung vak ang a, sazu pungin a hnathawh tur chu a chiang reng e. Tunah pawh hian Costa Rica rama utawk chi khat Golden Toad an tih chu a mang der tawh. Hei bakah nungcha mang mai thei tur awmin an ngai bawk. Khawlumin a hrinchhuah pawi tak chu thosi hi a ni. Thosi tan khawlum hi malsawmna a ni hlauh thung a. Hriat thei maiah pawh ram lum apiangah malaria a tam a nih hi. Heng bakah pawh hian natna thlentute zinga mi Machufo virus, hanta leh ebola te hi khawlumah an tam duh hle bawk.
Tin, khawvawt aiin khawlumah natna chi reng reng an pung duh bawk. Heti a nih chuan Global warm-ing vang hian natna hriat ngai lem loh pawh a la rawn inlar thei viau dawn a lo ni. Khawlum avanga tuifinriat hi hei aia a lum zel chuan Coral reef tam tak hi an thi mai dawn bawk. Mithiamte chuan Siberia rama Tundra chu tuiin a chim avangin carbon leh methane tak tak a chhuah phah tawh an ti. Vur tam tak a lo tui tak avangin chhiatna a thleng ta nual a. Greenland ramah hian kum khat chhungin vur tawlh avangin lirnghing vawi 32 lai a thleng hman tawh a, chu pawh lirnghing na pangngai tak Ritcher scale 5 laia na te a ni hlawm. World Glaciers Monitoring Service-in a chhinchhiah danin, tun hnaia vur tawih lian pui pui 442 chu khawvel boruak lumin a hrinchhuah vang a ni.
Kan hriat loh piah lamah Global warming hian chhiatna a thlen ta fo mai. Antartica hmuna rannung pakhat Adelie Penguins te chu kum 30 lek kal taa 32000 vel piang thin kha tunah chuan 11000 vel chauh an piang thin tawh. Tin, phengphehlep leh sihal tam tak hian an chenna hmun kalsanin ram vawt lam an pan sup sup tawh bawk. Khawlum avang hian rannung chi khat bettles an puang chiam a, kum 20 chhung lekin Alaska hmuna chhut a.
Heti anih chuan vur rama chengte tan tam a tlaktir zel tihna a ni.
Mizoram pawh hian 1999 atangin Green Mizoram te siamin a theih ang tawkin hma a la ve thin. Tin, Forest Development Agency te siamin hma a la zel a. Thing leh mau phun kawngah kan harh thar hle. Mizoramin ramngaw tha a la neih hi Sq Km 120 bawr vel chauh a nih tawh avangin duat an ngai hle tawh a ni. Kum tlemte liamtaa Serthlum leh zawngtah rah tha em em thin kha thing tuah atan lak a lo ngai ta. A eichhetu thingngette ei leh tu savate an awm tawh loh vang a ni. Sava ten hmun nuam zawk pan a lo ngai ta hi a pawi hle, keimahni thiamloh a ni. Nungchate tleina khawp thingphun lah a la harsa rih si a. Kumtin vah thlng a ni.
Sorkar hian eng anga nasain hma la mah se, mipui lam hian boruak chhia tam tak kan tihchhuah reng tho si chuan tlawng vuaka mat dap ang chauh a ni dawn.
Sawrkarin ramngaw venhim a tul zia a hria a, policy tam tak a duang fo tawh. Mizoramah pawh kum 10 liamta maiah khan Joint Forest Management hman a nih tawh kha. Amaherawhchu, heng policy hrang hrang hian kawngro a su thui em? Mipui tellova sorkar harh ringawt hian Global warming vanga khawlum zel tur hi a tiziaawm lem lo thei.
Pawimawh ta ber chu tanrual a ngai ta ber. Khawi ram sorkar mal ringawt thahnemngaihna hian kawngro a su vak dawn tlat lo. Lirthei tam tak hi tlan tir loh ngawt dawnin a dik thei lo. Toyota ringawt pawh hian lirthei nuai tel tak meuh an hralh chhuak a ni si a. Company dang zawng zawng nen phei chuan kum khata motor siam chhuah ringawt pawh hian kan lohal khu let tam tak meikhu a tichhuak ngei ang. Intihthaihna lam a ni lo tih hriain mithiamte hian mipui hnena khawvel lum zelin a nghawng tur hrilh hi an tihmakmawh a ni. He khawlum hian mi hausa leh rethei a hrut rual vek a, chutihlaiin mihausa te chuan in nuam zawk atangin eng emaw chen an la tuar dai thei ang. Ram rethei deuh ten khaw kheng an tuar viau laiin ram hausa ten khaw kheng chung pawha inven dan an nei leh zel ang a, tui a van deuh chuan an mamawh tawk tui an lei mai ang. Amaherawhchu, tui ber lei tur a awm miau loh chuan engtin nge ni ta ang? Vur a tui hum hum lain tui thianghlim in tur a tam phah chuang lovang.
Thlaite hian tui an mamawh hle mai a, an mamawh tawk aia tam an dawn erawh chuan thanna a pe hauh lo, chu chu tui lian a ni. Himalaya vur tuilian avanga Ganges lui kama leilet neitute hian harsatna an tawh chuan, an thlai thar hmanga chawm India mi tam takte an buai viau tho ang. Nawrh leh kawngzawh hmanga khawlum hi reh thei a ni dawn si lo. Tun atang hian Global warming hi ngaih pawimawh a tul tak zet tawh. A taka hmala tu tur chu sorkar a ni a, sorkar thu zawm tur chu mipui an ni.
Inringtawn kan nihna hian fimkhurna min pe teh se. Ecological balance hi a inbuktawk loh chuan mihring nun hi a buai vek tho ang. Nungchate hi chu tih tak takah chuan an thi mai a, an lainatawm love tihna lam nilovin, thihhnu lam an nei lem lo. Global waming hi eng ang pawhin lo nasa se la, heng nungcha tam takte hi chuan rei an tuar lem lovang. Keini mi nung, thlarau nei bawk hian kan tuar nasa dawn tih a lang reng. Thil harsa tak erawh a awm, chu chu carbondioxide tihtlem nan ramngawi neih that a tul a. Mihring ten hmasawnna kawng kan zawh dawn chuan ramngaw tichhe lovin engmah a tih theih loh tluk a ni. Kawlphetha hi kan nitin mamawh a ni a, khawlphetha siam dawn erawh chuan ramngaw tha lai tihchhiat a tul chang a awm fo. Kawng tha leh rel kawng chenin kan mamawh a ni si a. Ramngaw tichhe miah lova kal tir chu thil har lak a ni lawi si. Boruak chhia tam tak kan tichhuak a nih chuan, a lo hip raltu tur tam tak kan neih a ngai tihna a ni. Ramngaw tam tak kan tihchhiat chuan, ramngaw tam tak hmun dangah kan siam thar leh a ngai tihna a ni mai. Hei hi inbuktawk taka a kal loh chuan Global waming hi kan chunga thleng tur ngawih ngawih a nihna lai a awm thei ang.
Thil pakhat erawh ngaihtuah chian ngai awm. Hetia khawvel lo lum ta zel hi mihringte khawloh vang nge khuarel? Leilung siam tirh atang reng hian hun hnuhnung lamah hian khawvel hi heti tur r>ng hi a ni em? A chhanna chu engpawh nise, mihringte hian tihsual engemaw chu kan nei ve meuh mai.
Khuarel chhiatna thleng hi chu Pathian thu atang pawhin a dik thlap mai a. Hetiang ni lem lo, fimkhur nachang kan hriat loh vanga engemaw chen dan theih thil hi chu a awm, chung zingah chuan kan sawi lai mek khawlum zel pawh hi a ni awm e. Mizoram erawh kan la vannei hle a, mi rama celcius degree 40 chuang a nih lai pawhin degree 30 bawr velah a lum lai ber pawhin kan la awm thei. India ram hmun tam tak nen khaikhin phei chuan kan ram hi vur ram tluk hial a la ni. He boruak nuam tak hian kum engzat nge min daih ang? Kan rualawhna em em thilsiamna hmun lian tak tak kan la nei lo hi kan vanneihna pakhat chu a ni phawt mai. Kan neih loh tam tak hian kan ram hi boruak nuamah a la siam niin alang.
Amaherawhchu, kan ram dinhmun ang hi mi ram dinhmun a ni vek lo hi a pawi ta a ni. Kan lirthei l>t tam tak hi ram dangah a la awm a nih si chuan, keini boruak tihbawlhhlawh chin ringawt pawh hi a tam dawn tehlul nen. a vaia belhkhawm phei chuan ni atanga eng lokal hi hliah vek tawh awm a nia! Lo hal khu ringawt pawh hian eng chen tak pawi khawih ang maw? Kan hriat tlem a leiah kan thla a
GLOBAL WARMING
![](https://theaizawlpost.org/wp-content/uploads/tap_logo-min-large.jpg)