Goa state Forest Department chuan thupek chhuahin deputy Conservator of Forests (DCFs) te chu tuipui kama ramsate sapeltute laka an lo him theih nan ruahmanna kimchang tak siam vek turin a ti.
He thupek hi hmanni lawka sapeltu ten thang hmanga sanghal man an tumna lamah Keite thir thangah a lo awk an hmuh vanga sawi a ni. Forest department chuan officials te chu sapeltute chet hluarna hmun te a lema en theih (Map) tura siam tur leh kar tin zanah police te nena duty thin turin a chah a ni.
Goa Forest Department-in he thupek a chhuah hi October ni 11, 2023-a Goa chhim lam Simepaine-Mangueshi-a Keite pa thir thang hmanga awh a thih hnua hmuh a nih vanga sawi a ni. Hemi hma hian June thlaah pawh Keite nu chu Goa chhim lamah bawk Petkem thingtlang khua mimal farm-ah Sanghal man an tumna thir thangah bawh awkin a thi a hmuh a lo ni tawh bawk a ni.
He thil thleng chungchang chhuinaah hian huan enkawltu manager leh supervisor te man an niin Wildlife Protection Act hmanga thubuai siam sak an ni. Hetiang bawk hian December 2022 khan Sattari bul lawka Mhadei Wildlife Sanctuary-ah thir thang hmanga Sanghal man an tumna lamah Keite lo awk zawkin nunna a lo hloh tawh bawk a ni.
The Assistant Conservator of Forest (ACF)-in October 16 a thurawn a lo siam tawh angin DCFs te chu sapeltu ten an sapel dan tur an ruahman dan ang zir zela an mahni veh veh turin ruahmanna fel tak siam turin a chah a, hei hian sapel dan chi hrang hrang leh khawii lai hmun bik te a lema entir theih dan te leh mipuite hnena sa pel tawh lo tura inhrilh hriatna tha neih te a huam a ni.
Forest thuneitute chuan ruahmanna siamin, “Range Officer te chuan a tam thei ang ber sapeltu te chhui hna an thawk ang a, a tlem ber vawi khat tal kar khatah kea kalin hnu chhui hna/venhimna hna hi an thawk tur a ni. Chutiang bawkin ACF leh DCF te pawhin kar khat ah vawi hnih tal venhimhna thawkin an feh chhuak anga zan khat phei chu ram hnuaiah an riak tur a ni.
Thla bial zan hi sapeltute hun duhthusam a nih avangin hemi lai bawr vel leh hemi zan tak phei hi chu venhimna uluk lehzual hle tur a ni” tiin thuchhuah an siam a ni. Thuneitu te sawi danin mimal ram neitu ten an ram hungnaah Sanghal man tumin thir thang an kam thin thu an sawi a.
“Sanghal thang an kam thin a, mahse Keite hlir heng thangah te hian an awk leh si thin a. Keite vun, a ruh leh a tin duh avanga Keite veh a nih thu hi hriat a ni lo,” tiin Forest thuneitute chuan an sawi a ni. “Sapeltute hian Sanghal sa hi hmun thenkhatah tui an tih em avangin zawrh leh atana pel an ni. Tin, mi thenkhat chuan an thlai chin te Sanghal laka venhim nan thir thangte an kam bawk a. Keite-in Sanghal man tuma a vehna lam kawngah Sanghal thangah a lo awk ta hlauh zawk a ni”, ti te-in forest thuneitu te chuan an sawi bawk. Zir chiannain a tarlan danin Goa state-ah hian Keite 86 bawr vel awm tura ngaih a ni.
Goa-a Sapeltu ten Thla bial zan thlang
