La Liga season kal laia top scorer ni mek Jude Bellingham chuan Spain leilunga a goal thun mar a chhunzawm zel a, Pathianni zana Real Madrid-in 4-1 ngawta an mikhual Villarreal an sawpna inkhelah goal khat thawh lehin, league table-ah Bernabeu club hian a chungber an luah chho leh ta bawk.
England midfielder Bellingham hian minute 25-ah Luka Modric siamsak atanga goal hmahruai thawhin, hei hi season kal laia a league goal 13 thunna a ni tawh.
Birmingham City midfielder hlui Bellingham hi Real chuan kumin nipui lai khan Borussia Dortmund atangin euro maktaduai 103 (£88m)-in an lei a, Pathianni zan thleng khan a club thar tan game 20 khelin goal 17 a thun tling tawh.
Rodrygo chuan minute 37-ah mualneitu team goal hnihna thun ve lehin, he goal hi offside-a ham a nih zet hnuah Video Assistant Referee (VAR) endikna hnuaiah goal-a pawm a ni a; chawlhlawk hmain Jose Luis Morales chuan Villarreal siphurh pakhat zawk sut thenin, hei hi Pathianni zana an goal neihchhun a ni nghal.
Villarreal beiseina hi a nung rei ta chuang lo a, minute 64-ah Brahim Diaz chuan Real Madrid goal phai chhungkhatin, minute li a liam leh rualin Modric chuan Bernabeu club goal lina leh he inkhela goal lut hnuhnungber ni nghal a thawh ve leh a, an aia game khata khel tlem zawk Girona nekchhuakin Spanish giants-in table-ah hma an hruai ve leh ta thung a, point khatin hma an hruai fal.
Carlo Ancelotti team hi a hma kar chiah khan Real Betis nen 1-1-a inhnehtawkin Girona chuan an hmahruaina an chhuhsak a, tunah a ler an luahkir leh ta a ni.
Nizan inkhel result tarlan hman lohah Girona hian Alaves an hneh a nih chuan Real Madrid an lehthal leh dawn a, top flight-a season li chiah la khawsa tling Girona tlo rei lutuk hian mak tih a hlawh hle tawh a ni.
Goal khung thulh thei lo Jude Bellingham
