Goal mawi ber thuntu Garnacho

Goal mawi ber thuntu Garnacho
Fifa Best Awards an semchhuah \hinah hian goal mawi bera thlanchhuah khungtu tan Puskas Award dah a ni \hin a, kumin hian Manchester United winger Alejandro Garnacho chu he chawimawina dawngtu hi niin, nikum November thlaa sithum faia mualneitu Everton an sawp \uma a bicycle kick pui tak kha a nihlawhpui ta a ni.
He acrobatic strike bawk hi Premier League goal of the season-ah an lo thlang tawh bawk.
Mipa goal thun mawi ber thlanaah hian Europa League lama West Ham tan Freiburg laka Mohammed Kudus-a solo goal tuihnai zet pawh kha nominate a ni.
Argentine Garnacho chuan a chawimawina dawn chu amah leh a chhungkuain an chhuang hle tih sawi chungin a goal thun kha a hriat reng tawh tur goal special bik a nih thu a tarlang tel.
Hmeichhe goal mawi ber ve thung
Tun season hma lam zawng kha chuan he award hi mipa tan a ni a, tunah erawh hmeichhe tan Marta Award an siam thar ve ta a, he award hmasaber hi lawmman hming putu Brazil legend Marta ngeiin a dawng!
Kumin nipui thawt laia a vawirukna atana Olympic-a inlan Marta kuta Puskas Award tlukpui Marta Award a luh theih chhan chu kumin June thlaa Jamaica laka a goal khung pui tak kha a ni.
Kum 38-a upa ni tawh Brazilian Marta hi a hmingpum chu Marta Vieira da Silva niin, National Women’s Soccer League club Orlando Pride forward a ni a, hmeichhe footballer piang chhuak tawh zinga thiambera ngaitu ngah ber a nih a rinawm!
Best women’s goalkeeper award dawngtu ve thung chu American Alyssa Naeher of Chicago Red Stars niin, hmeichhe coach of the year atan United States lama a insawn hmaa kum 12 chhung zet Chelsea manager hna lo thawk tawh Emma Hayes a ni.
Hayes hi best women’s coach a nih theih chhan chu kumin Paris Olympic Games-a United States a champion-pui vang kha niin, US lama a pem hma chiah seasonliamta mai pawh khan Chelsea chu WSL title a lakpui a, kha kha a zawna London club-in vawinga zet league title an lakna a ni.
Tun hi Hayes kuta he award a luh vawihnihna niin, kum 2021 khan hmeichhe coach \ha ber atan Fifa chuan a lo thlang tawh bawk.
A hnuah he title hi England boss Sarina Wiegman chuan kum 2022 leh 2023 khan dawngin, kumin Manchester City head coach Gareth Taylor leh Chelsea lama amah thlaktu Sonia Bompastor-te hmakhalhin he prize hi a dawng nawn leh.