Nilaini zan French Ligue 1 inkhel pakhatah Paris St-Germain chuan 3-1-in an mikhual Metz an hneh a, he match-a PSG chakpuitu Kylian Mbappe chuan a kum 25 tlin zanah a lawmna’n goal hnih a khung a, a unaupa Ethan Mbappe tan tun kha Paris club tana a khelh vawikhatna a ni ve bawk.
Paris Saint-Germain under-19 team tana khel thin Ethan hian hun tawp lamah khelmual lutin, senior team tana a inlan vawikhatnaah midfielder patuai hian goal khung zo lo mah se a team a chakpui a, a u nen French champion tan an kheldun thei ta a ni.
Nilaini zana birthday boy Mbappe khan a kum 19-na piancham herchhuah zan takah Paris St-Germain tan goal a lo thun tawh bawk.
Parc des Princes inkhelah khan mualneitu team-in chawlhlawk hmain goal khung zo lo mah se second half tir lam minute 49-ah Vitinha chuan Lee Kang-in siamsak atangin French champion hmahruaina goal a thun sa; minute 60-ah Mbappe goal hmasa zawk lut chhunzawmin, minute 12 a kal leh tihah Matthieu Udol chuan Metz beiseina siamsakin mikhual siphurh a sut a, mahse, minute 83-ah PSG player awm tawh zinga an top goalscorer ni mek Mbappe bawkin home team goal phai a chhungkhat a, a goal hnihna siamsaktu hi goal hmahruai khungtu Vitinha kha a ni.
Ti khan, Mbappe kha PSG player zinga kum ruk chhunga birthday ni taka league goal khung leh thei hmasaber niin, tarlan tawh ang khan kum 19 a tlin zan chiaha Caen laka 3-1 hnehna bawk an chan tumin piancham lawmna goal a lo tilut tawh bawk a ni.
Tun season kal lai tawp rual hian PSG-a France captain contract neih lai hi a tawp ve tawh dawn a, a chhuah tum thawm rikchhuahna a rei ve tawh bawk a, kum ruk kalta leh Nilaini zan kha a club vawn lai tana birthday lawm zana a goal thun hmasakber leh a tawpna a nih tawh mai an ring a, lo chhuak ta pawh ni se PSG chuan Mbappe an la kawl tho dawn!
Karlaihawl inkhel tawp dawnah PSG boss Luis Enrique chuan rawlthar kum 16 leka upa midfielder Ethan Mbappe a luhtir a, a unaupa nena Paris club zawm rual an ni a, senior team tana khel turin ei a tling ve tan ta a ni.
Nilaini zan French Ligue 1 inkhel dangah table-a pahnihna luahtu Nice pawh an mikhual Lens lakah sihnih faiin chak mah se Enrique team PSG hian thlasik chawlh chhungin table-ah point ngain hma an hruai hlen rih dawn a ni.
PSG hian khelh 17 atanga point 40 hum chungin an hmahruaina an sawhnghet leh hret a; Leugue 1 winter break zawha an kirlehna game-ah January ni 14 khian Lens a luhkhung dawn a, chumi hma January ni 3-ah French Cup champion Toulouse nen Trophee des Champions-ah an insu dawn a, chumi atanga nili a liam leh rualin cup fixture lamah sixth-tier club Revel khelmual an lut bawk ang.
Goal nena birthday lawm Mbappe
