Mizoram Gorkha Youth Association (Central) huaihawtin Gorkha ho zinga thu leh hla lama puipa bera an ngaih Adikavi Bhanubhakta Acharya champha vawi 209-na ‘Bhanu Jayanti’ chu Ningani khan hmundang rualin Mizoramah pawh hman a ni.
A hmanna pui ber Aizawla chuan Adikavi Bhanubhakta Acharya thuziak hrang hrang te chhiarchhuah a ni a. Gorkha hnam lam chi hrang hrang entir a nih bakah zirlai tithate chawimawi a ni.
He Ni pual hian kar kalta Nepali Middle School Khatla-ah Adikavi Bhanubhakta Acharya thu leh hla phuahte bakah thu leh hla lama tuimiten an thuziak chhiarchhuakin, thangtharten Gorkha hnam ziarang leh an piputen an hnutchhiah thu leh hla lama an hausakna puanzarna, chawimawina leh Kavi Gosthi (seminar) neih a ni. Zirlaite tan essay writing, sketching leh quiz intihsiak buatsaih a ni bawk.
MGYA hruaitute sawi danin, Adikavi Bhanubhakta Acharya hi Nepal ram Tanahu district-a Chundi Ramgha khuaah kum 1814 khan a piang a. Puithiam chhungkua an nih avangin a hranpa in sikul kal lo mah se, a pa zirtirna avangin ziak leh chhiar lamah a thleng sang hle. Thu leh hla lamah hnutchhiah tam tak a nei a, khawvelin a hriat lar chhan ber chu, Hindu sakhaw lehkhabu thianghlim ‘Ramayana’, Sanskrit tawng harsa tak atanga Nepali tawnga a lehlin vang a ni. Amah hi Gorkha hnahthlak hnam hrang hrangte inkara inpumkhatna siamtua ngaih a ni a. Kum 1868 khan a thi a ni.
He Ni lawmna hi Kolasib leh Mizoram hmun dangah pawh MGYA Branch ten an buatsaih a ni.
Gorkha thalaiten Thu leh Hla Kutpui hmang
