MC. Lalthianghlima
Mizorama kan politician, khawpui leh thingtlang ( Unit atanga Headquartes) a mite hi “Enge politics i luhchilh chhan?” tiin zawt ta ila, an thinlung takin dâwt sawi hauh lovin chhâng ta sela, eng emaw zât hi chuan “Kan chhungkaw tun nun nân politics hi ka luhchilh a ni” an tih mai ka ring. Khawtlang leh ram siam that duhna tak tak leh veina thinlung tak tak neih vanga politics luh chilh hi engzât tak awm ang maw? ka ti thin. Hetiang ngaihdan kan neih vang hian kan politician-te hi kan hmu sakhi vek tihna a ni lo va, party tinah hian ram leh khawtlang vei leh hmangaih tak tak an awm vek a, an tlêm deuh tih thu mai a ni zawk.
Kan politician eng emaw zâtte hi chuan, an tawngkamah ram leh hnam hmangaihna thu hi chu mar nalh zet zet hian hlam chen chen hi an sawi thei zul a, mahse an khawsak zia hian a pho lang meuh lo chu a nih hi, sorkarna siamtu party apianga tel thei, thleng tlawr zuan kan tih ang chi hi politician inti te zingah tam tak kan kawl êm ûm a nih hi.
Hetiang mite hian, politics chu inrinni bazar lun tak ang mai hian, sumdawnna hmunah an ngai tlat a, hotute tlawn lungawia mahni tâna sum hai lut tam thiam apiangte chu politics thiam-ah kan chhuah daih a; “politics a khel hlawhtling a, building lian tak a sa, motor thar a lei, contrac nuaih za chuang man a hmu” tih velte hi politics khêl hlawhtling sawi nân kan hmang a, a nihna tak chhût erawh chuan, a zahthlakin kan khawngaihthlak ngawt mai.
Hetiang mi, politics hi sum siamna hmun emaw ti tlat leh Lalna leh thuneihna âtchilh tlatte hi politician chhe mi an ni, ram leh hnam an hmangaih tak tak lo.
A chang chuan, mipui lam pawh hian thiamlohna kan nei ve tlat thin, kan duh leh mamawhna zawnah hian dik taka kan tih avanga thil eng emaw hmu dawn lova kan inhriat hian, “Mi dik, dik taka thil ti” te hi kan duh tak tak nange aw tih tur kan ni ve tho thin bawk, mi dik tak ai chuan dik nial nual, dik ziktluak lo, a hming a mâwi tâwk chauhva dikte hi kan duh zawk emaw tih mai tur kan nihna lai a awm ve bawk.
Khitiang zawng zawng khi, “Gospel politics” kan tih fo ang hi a ni lo, pamhamna leh mahni hma chauh sialna mai a ni, kan chan a thata, kan hlawk dâwn phawt chuan ‘Dikna, rinawmna’ tih te hi a rim a ra pawh kan hre duh leh chuang hlei lova, a dik lo tih kan hriat rengte pawh kan pawm leh thei mai a, a dik a ni tih kan hriat rengte pawh kan duh hunah chuan kan hnungchhawn leh mai. Mi dik lo leh dan bawhchhiate chunga action la ngamte lah chu misual, lainatna nei lo angah kan chhuah lek lek fo leh ang lawi bawk si.
Rev. Chanchinmawia (L) khan “Kan ramah hian dikna chu a tlêm khawp a sin” a tih leh Pu M. Lalmanzuala’n “Coruption kai rualna ber” tih thu an sawite pawh hi thil dik tak a nia, phat rual a awm lo. Pu Lalramnghinglova hla ” Dik lo te hnâwl ngam tur leh pamhamte endawng ngama’n kan ramin min au e, i chhâng dawn em” a tihte chu a takin kan la nunpui hleithei mang tlat lo a ang riau a ni.
Dik lote hnâwla, endawng ngam tur hian, a ti diklotu kha mi hausa deuh emaw thiltithei deuh emaw an lo nih chuan, dova hnâwl ngam an khât leh pharh zêl a, a ti diklotu zawka ngaih chuan lamtang a ngahin, thlavang hauhtu an ngah leh phian zêl a, a vawtu chu êk kan chehtir fova, kan khawsa zia hi hahthlak ve tak chu a ni. Dikna leh rinawmnate hi kan han sawi ve hluai thin tak na a, a taka chet chhuahpui hi a har ngang a ni ang e.
Mizo Union hun lai khan MLA election ah candidate pakhat chuan, a bial chhunga khaw hrang hrangte kha inthlan nîa thingpui lumna senso atan pawisa a pe a, inthlan a han zova khaw pakhat party hruaitute chuan, an sum hman bang zawng chu an party candidate hnênah chuan an pe kîr leh vek a ni âwm e, khatiang system kha a ni “Gospel Politics” kan tih chu ni, dikna leh rinawmna, kan thurin Bible nêna inrem tak hian politics a luhchilh theih a ni. Bible hian Mosia te, Nehemia te, Joshua leh adt.. hi politician tiin record lo mah se, a nihna takah chuan Kristian Politician (Gospel politician) an va ni chiang tak êm. Hemite hi kan entawn phak lo kan tih chuan Delhi Chief Minister Arvind Kejriwal-a tal khu entawn ang u hmiang.
Kan Kristianna leh politics hi a inhne rem thei a ni, kan la kalpui fuh tawk rih lo mai a ni zawk niin a lang. Dik taka tiha, rinawm taka tih hian chân dawnah leh kan hmuh tur ang hmu phak dawn lovah kan inngâi tlat em maw ni? Chutiang a ni lo, dik tak leh rinawm taka tihna nun, Gospel Politics hi a tundin theih tih i hria ang u.
Kejriwal-a khu a lan danah chuan Kristian politician ni âwma mawi a ni a, mahse a ni hauh si lo Kristian politician chu ni lo mah se, Gospel politician title chu pek a phû ngawih ngawih.
Kan ram riangtea kan politician te u, harh teh u, harh mawlh teh u khai. Politics kan hmelhriat dan hi thlak ila, politics hmel thar hmuh tumin ke pên ho ila, mahni hlawkna tur ringawt politics game hi hnawl ila, Gospel politics hi i tung ding ang u.
Politician-a inchhâl, mahni tanghma chauh ngaihtuaha politics hi ram siamna hmun a nih hre lova sum siamna hmun emaw ti tlatte u, politics field ata hi lo châwl ngam hram ula. Ram leh hnam hmangaihna thinlung dik tak pu-a, dikna leh rinawmna nena ram leh khawtlang kaihruai thei turte hi a lâi lum lo kian teh u khai. Kan ram hian Gospel politics, Gospel politician a mamawh a nih hi.