Kumin matric result-ah exam beitu hlawhtling zat 73.37% a ni a; tun hnai kum ruk kalta chhung result hi, tlakhniam nei lova a sang zawnga a la chhoh ve ngar ngar avangin a lawmawm tiin a sawi theih ang.
Chutih rual erawh chuan, kum 20 kalta chhunga matric result han en vang vang hian, a changin a hniam thut a, zawi zawiin a sang leh hret hret a, kum ruk dan velah a tlahniam leh thut a, chumi hnuah zawi zawiin a sang leh hret hret thin. Electric current chu ni se, ‘a su (fluctuate) nasa hle’ tihtur chi a ni.
Hetih lai hian, sawrkar enkawl sikul (Govt School) te hian engemaw chenah hmasawnna chu han nei ve bawk thin mah se, management-wise zawnga han tehin Deficit te, Aided te, Lumpsum leh Private te hnungah a la kal pai tuang tuang reng a; tun tum matric result-ah pawh hian, a hnuhnung berah a awm.
Hetia han ngaih mai chuan, sawrkar sikulte chu zirtirtu pawh ‘trained’ vek, hlawh hnem bawk si; school building, accomodation leh hmunhmate tha zawk, facility leh equipment changtlung zawk, zirtirtu pawh indaih zawk an ni a; chuvangin, result pawh hi sawrkar sikul ni ve lote aia sang larh ni thei tura ngaih a ni; mahse, a letling thawk a ni lawi si.
‘Hei hi eng vang nge?’ tih zawhna a awm lo thei lo va, mahse a chhanna pek hi thil harsa a ni hran lovang. Private school te ang hian han tang tak tak se chuan, result pawh khitah khitah a ni nghal ngeiin a rinawm.
Sawrkar sikul result chhia hian mirethei zawkte a nghawng nasa hle. Dinhmun harsa ve tak takten sikul fee awmlohna a nih avangin sawrkar sikul an pan ngawt duh bik lo va, sum tam tak sensona private sikul harsa takin an pan tawk tawk zawk lo thei lova, hei hi a chhan chu sawrkar sikul result a chhiat thin vang hi a ni ber awm e.
Sawrkar sikulte hi private school-te leh a dangten an el tur zawka kan chherchhuah theih hunah chuan zirna lama hmasawnna ‘education revolution’ hi a lo piang ngeiin a rinawm a. HSLC exam result a chhuah apianga Top Ten-a lang hnem zawk turin sawrkar sikulte hian theihna ‘potential’ lian tak an nei a, chu potential haichhuak tur chuan sawrkar hian chakna a nei tawk a, han inhum sek deuh se, private sikulte hi chu an nek per lawng lawng thei tih a chiang reng a ni.
Government school hi…
![](https://theaizawlpost.org/wp-content/uploads/tap_logo-min-large.jpg)