Mizoram Legislative Assembly pakuana Session hmasa ber ni thum awh chu nimin khan tluang taka zawhfel a lo ni leh ta a. Nimin a tawp ni khan, a hma nia Governor thusawi chungchanga lawmthu sawina motion chu member-ten an sawiho a. Oppostion lam pawhin Governor thusawi chu tha an tih thu leh an thlawp thu an sawi vek a. House Leader pawhin a hriat ve phak china Governor Speech-a a tha ber nia a hriat thu leh, sawihona pawh member-te an lungrual tlan ber tum nia a hriat thu a sawi nghe nghe a ni.
Tun tum sawrkar hi a thar tha hle a, chawlhkar khat leka upa a la nih bawk avangin hnathawh hmuh tur a la awm hman lo. Sawrkar thar lakluh nia chief minister-in ni 100 chhunga tihhlawhtlin tur a puan nghal bak kha chu sawrkar kutthlakna hmuh tur a la awm hman lo a ni ber a. Governor speech-ah pawh sawrkar thar hmalak dan tur bak tarlan tehchiam tur a la awm hman lo. Chutih rualin, sawrkar thar hmalak dan tur erawh, a hlawhtlin chhoh zel chuan Mizoramin hmabak êng tak a nei dawn tih a sawi theih.
Chief minister-in a tawpa a wind up-naah sawrkar thar hmalak nghalna eng eng emaw a tarlang a. Chung zingah chuan Right to Public Service Act hman nghal a nih theih nan department tinah instruction pek a nih tawh thu a sawi kha kutthlakna tharlam zinga pawimawh tak niin a lang a. Electric bill bat a nih tawh loh tur thu a tarlan pawh kha thil thar tha tak a ni bawk. Social welfare lam changtu minister-in, social security chungchanga MLA ten ruang phurh an buaipui thin ang kha, sawrkar mawhphurhnaah a awm tawh dawn tih a sawi chhuah pawh kha thil thar danglam tak a ni bawk awm e.
Nimin session-ah khan first timer tih tawngkam a lar hle a. Mizoram rorelna in sang bera an vawikhat thusawina a nih avangin, motion of thanks lam hawi ni chiah lo pawh ngaihthlak tur a awm nual a, an tan chuan ‘maiden speech’ a nih ve miau avangin thahnemngaih a lo na a, an han hawl kual zau deuh pawh kha an thiamawm rih hle. |awngkam delete ngai a awm hman erawh, tun hnu zelah House member-ten fimkhur phah nan an hman a pawimawh hle awm e. Chutih laiin, House chhunga experience lo nei tawh senior zawkte thusawi kalhmang erawh a dang zak thung.
Chief minister-in Right to Public Service Act a ngai pawimawh kha a lawmawm hle a. Chutih rual chuan, Right to Information Act chungchangah pawh, hmasawnna tur a la tam hle a. RTI hmanga information dil nikhuaa record fel tak awmsa click chhuah zeuh tur a awm mumal lo thin hi a veiawm hle a. Thil harsa vak lo tur, han lehlan nghal mai theih tura ngaih pawh, a thlaa thla nghah ngaih chang a awm fo pawh hi, record vawn fel kawngah pawh hian sawrkar thar hian hma thar la tel thei se, chu chu mipui zangkhaina tur a nih rualin sawrkar tan pawha zangkhaithlak a ni nghal dawn bawk a ni.
Governor’s speech sawihona leh a behbawm
