Vawiin – January 25 hi National Voter’s Day a ni a, kuminah sawrkar chawlh a nih avangin Mizoram hmun tam zawkah chuan January 24 khan hman a ni. Aizawlah pawh Govt. Hrangbana College-a Department of Political Science, Public Administration leh Electoral Literacy Club tangho chuan National Voter’s Day 2025 hi Zirtawpni khan an hmang.
Govt HBC Department of Political Science associate professor Dr H Lalzuithangi chuan kumin hi Election Commission of India kum 75 tlinna a ni tih sawiin, India rama vote nei zawng zawng hi tunah vaibelchhe 99.1 niin, thalai kum 18-29 inkar vote nei chu vaibelchhe 21.7 an ni a; India ram chu khawvela democracy lian ber ni satliah loin, thalaite hmakhua ngai tak ram a ni tih a sawi. Hrangbana College zirlaite chu inthlan apiangin vote thlak turin a ngen bawk.
National Voter’s Day hi kum 2011-a hman tan niin, kumin thupui chu “Nothing Like Voting, I vote for sure” (Vote thlak tluka tha a awm lo, Vote ka thlak ngei dawn) tih a ni. He hunah hian zirtirtu leh zirlaiten thutiam la in, Electoral Literary Club in-charge Lalhruaitluangi kaihhruaiin, India ram inpumkhatna vawng tur leh sakhua emaw hnam emaw avanga hleih nei loa vote thlak zel turin thu tiam a ni a. Kumin February 12-a Mizorama local council leh village council inthlana vote thlak turin an intiam bawk.
Govt. HBC-ah National Voters Day hmang
