Mizoram sawrkarin sawhthing lei leh hralh chungchangah grade A leh B a siam hrang dawn lo tih chief minister Lalduhoma chuan a sawi.
Thawhtanni tlaia ZPM Gen. Hqrs-a general secretary rualin chief minister an hmuhnaah sawhthing grade siam tum nia sawi chungchang hi an sawipui a. Chief minister chuan ruahmanna hmasaah chuan sawhthing lei leh hralh chungchangah grade A leh B siam tumna a awm a, a chhan chu, tunhma lamin sawhthing hralh chungchangah rilru pamham pu tawk an lo awm thin a, thenkhatin lei kai tifai mang lo leh a buk rih theih nan tui lo leih huh duh tawk an awm thin a, hei hian insumdawn tawnnaah harsatna a siam thin tih an hriat tih sawiin, “Kn sumdawnpuite nen thawhhona tha leh tlo kan neih theih nan he ruahmanna hi siam a ni,” a ti.
Mipui lamin sawrkar ruahmanna hi an hriatthiam chiah loh avang leh kuthnathawktute rilru a hnual ang tih hlauin he ruahmana hi mipui hriatthiam zawnga her remin, grade A leh B a awm dawn lo tih a sawi.
Hetihrual hian sawhthing chingtuten an hralh dawn hunah an sawhthing chu a fai tha hle tur a ni tih chief minister hian sawiin, “Rilru pamham pu leh hlawk tum lutukna avanga insumdawn tawn nana him lo thil lo ti an awm a nih chuan, a hralhna kawnga harsatna an tawk a nih pawhin sawrkawin mawh a phur dawn lo a ni,” a ti.
Thlai thar lei chu sawrkar flagship pawimawh ber, inthlan hma atanga mipui hnena an lo aupui tawh a ni tih Lalduhoma hian a sawi a. Kuthnathawktute khaichhuahna tura hmalakna pawimawh tak a nih avangin Pathianin mal a sawm ngei an beisei tih a sawi. Mipui an ti beidawng thiang loa, an ruahmanna a hlawhtlin theih nan helama mawhphurtuten ngawrh takin hna an thawk mek tih a sawi bawk.
Tlai thar lei leh hralh chungchangah hnamdangten Mizote chu hnam rinawm leh sumdawnpui tlakah min ngaise an duh tih sawiin, “Tunhma thil avanga mipui rilru puthmang kal dik tawh lote pawh siamthat kan inbeisei a. ZPM chu mipui sawrkar kan nih angin, thil tha turah chuan mipui aw kan ngaithla zel dawn a, a tul hunah chuan huaisen takin kan thu ah kan ding tlat thung dawn,” a ti.
Grade A leh B awm dawn lo – Chief minister
