Rimawi khawvela legend an tih khawpa ropui niin, Grammy Award pawh pakua a dawng tawh a, kumin hian a 10-na a dawn theih ngei a rinawm lehnghal a, chuti chung chuan Jomi Mitchell hi Grammy Award semnaah a la perform ngai lo a, kumin hian a vawi khatnan he stage-ah hian a perform ve dawn ta a ni.
Joni Mitchell hian 1970 khan a vawi khat nan Grammy Award a dawng a, 2002-ah Lifetime Achievemeny Award a dawng a, chu chu a Grammy dawn hnuhnun ber a la ni rih a, mahse, kumin hian best folk album a dawn ngei a rinawm. Joni Mitchell hian a Grammy Award hmasa ber hi kum 54 liamta khan folk category-ah (best folk performance) ‘Clouds’ hla avangin award a lo dawng tawh a ni.
Kumin Grammy-ah hian perform zaithiam pariat hming an puang tawh a, perform tura puan tawh te hi an kum pawh a inthlau ve angreng hlawm khawp mai, Olivia Rodrigo, kum 20, Billie Eilish, kum 22, Dua Lipa, kum 28 te an awm laiin, kum 60 chunglam U2, Billy Joel (kum 74) leh Joni Mitchell (kum 80) te an tel a, kum 30 bawr velah Burna Boys leh Travis Scott, km 32 ve ve leh Luke Combs, kum 33, te an ni.
Grammy stage-ah a vawi khat nan Joni Mitchell perform dawn
