Grand Canyon-a ram kang inman kai chak tak vangin insaseng
Arizona, US-a Grand Canyon National Park hmangthlang lama ram kang chu darkar 24 lek chhungin a let 10 chuanga zau a kang hman niin sorkarin a sawi.
White Sage Fire an tih hi Nilaini atanga kang tan kha niin Jacob Lake bulah ram acre 19,100 vela zau a kang tawh a, park chhunga North Rim leh a chheh vela chengte chu hmun himah an insuan phah.
Inrinni thleng khan engmah thunun theih la ni lovin a zau zawng zelin a la kang niin thuneituten an sawi.
Khaw lum lutuk, thli chak tak leh thing ding ro lutuk chuan kang hi a timan kai chak zual niin park hotute chuan an sawi a. A bul lawkah hian kang dang, Dragon Bravo Fire an tih chu a kang zau zel bawk.
Grand Canyon park thuneitute chuan ‘tumah thi leh hliam an awm an la hre lo’ tih an social media-ah an tar lang a, mi cheng leh thawktute pawh him takin hmun dangah an saseng thei tih an sawi.
Thuneitute hian Zirtawpni atang khan Nilaini thleng hian khaw lum uchuak tak, 46°C thleng pawh ni thei a la awm dawn tih an sawi lawk a, Grand Canyon huam chhunga zin khawthawng mite pawh fimkhur turin an chah.
Park thuneitute hian Thawhlehni khan Grand Canyon chhungah hian zin khawthawng kum 67 mi a thi tih an lo sawi tawh a. Hiker hi Texas-a mi niin Cedar Ridge hnuaia South Kaibab Trail-ah nikhawhrelova hmuh a ni a, chhan tuma beih ni mah se an thei ta lo tih National Park Service chuan a sawi.
Zirtawpni chawhnu thleng khan ram kang avang hian park chhunga North Rim atangin ‘mikhual 500 vel’ hmun himah an saseng tawh tih Grand Canyon thawktute chuan an sawi.
Kang thelhtuten kang hi lei leh van sang atangin Nilaini atang khan chhun zan zawmin an thelh mek.
“Kang hian Jacob Lake lam a pan mek avangin mi la awmte chu insaseng tura tih an ni a, North Rim tlawhtute pawh rang taka inthiarfihlim tura tih an ni,” tiin Ningani khan Grand Canyon park staff-te chuan an sawi.
A bula kawngpui, State Route 89A pawh khar a ni a, Arizona Department of Transportation chuan rei deuh zawk pawh khar a ngai mai thei tih an sawi.
Ram kang mai thei hi Arizona piah lam thleng a ni tawh a. Ningani khan Calorado khawthlang lam, Denver atanga chhimthlang km 418 vela hla, Gunnison National Park-a Black Canyon-ah pawh khan tekin thing a din avangin kang a insiam a ni.
Upper Colorado River Interagency Fire Management Unit chuan ‘tek tla avanga ram kang hmun 10 vela awm chu buaipui mek a ni’ tih Ningani khan an sawi.
Grand Canyon-a ram kang inman kai chak tak vangin insaseng
