Greece ram kang a zual, mi tam tak insaseng tawh

Greece ram kang a zual, mi tam tak insaseng tawh
Greece-a nasa taka ram kang mek chu Crete khawchhak lamah thunun theih a la ni lo zel a, Nilaini chawhnu khan Ierapetra khawpui bula ram ngaw chhah tha lai, chhengchhe takah a kang thar leh bawk.
Beaufort scale-a pariat lai kai thli na takin a puih avangin chhim lam hawiin a inman kai chak hle a, chenna, khualzin thlenna leh thil pawimawh hrang hrangte a derthawng ta hle.
Kang mek thui zawng hi km ruk vel a ni tawh tih emergency services chuan an sawi a, thelh a hautak phah hle tih an sawi.
A khu pawhin a dap zau hle tawh a, a hnai deuhvah phei chuan engmah hmuh theih loh tluk a ni tawh.
A khu hian Achlia, Lasithi-a a thelhtuten an beih mekna atanga km 10 vela hla, Makry Gialos vaukam thlengin a tuam tawh a ni.
Police-in Agia Fotia bula kawngpui chu an khar a, mi chengte chu boruak bawlhhlawh, lum leh meivap tla nasa avangin tul hle lovah chuan pawn chhuak lo turin an chah.
Agia Fotia-ah hian chenna leh mi luah hawh theih hmunte a kang chhe nual tawh a, power a awm lo bawk niin tual chhung miten an sawi a. Upa zual pali chu meikhu avanga thawk lama harsatna an neih avangin damdawi inah hruai an ni.
Crete-a damdawi in zawng zawng chu thuneituten inring turin an chah.
Thuneitute hian Ferma-a khualbuk, in luah theih leh chenna in te chu chhuahsan vek turin an ti bawk a. Insaseng hna hi fire service, police leh mi inpeten an buaipui mek.
Mi 1,500 vel heng lai chhehvelah hian insasengin Ierapetra an pan khawm a. Mi 200 vel chu indoor sports arena-ah an awm mek.
Kang thelh hna pawh nasa zawka beih niin Nilaini zan khan mi 155, specialised foot team pariat leh a thelhna khawl 38-in an bei mek a. Zanah pawh helicopter pali hmangin chung lam atangin thelh a ni.
Kang thelhtu 17 leh 1st EMODE (Special Forest Firefighting Unit) foot team khatin lawngin Piraeus atangin khawl panga nen an pan mek a, Elefsina atang mi 33 leh EMODE team team li dang an kal mek bawk.
Sorkar thupuanna, ERT chuan fire service-te hi kang hma lam atanga inhnukdawkin mihring himna tur leh hmun derthawng zual lai veng tura tih an ni rih tih puan a ni.
Kawngpui khar a nih avanga insaseng thei lote chu lawngleng hmanga thiar chhuah an ni bawk.
Ram kang mek hi Agia Fotia leh Skinokapsala khaw inkar atanga intan, ram ngaw chhah lai man kai ta nia hriat a ni a. A ram a chhengchhia a, a rovin thli a na bawk a, thelh a hautak hle.
Kar tir lamah khan Turkey-ah khawthlang lama Izmir province-ah ram kang avangin mi 50,000 chuang hmun himah thiar chhuah an lo ni tawh.
Hetih lai hian Europe chu khaw lum uchuak takin tuamin mi paruk thi an awm tawh a. Thite hi Spain leh Italy-a mite niin France-ah a hma lawkin thi an awm tawh bawk.