Greece ram kang a zual, mi tam tak insaseng tawhCourt zah lohna avangin thla ruk tang turin Hasina-i hremGreece ram kang a zual, mi tam tak insaseng tawh

Bangladesh atanga tlanchhe mek, prime minister hlui, Sheikh Hasina-i chu an rama International Crimes Tribunal (ICT) chuan court zah loh taka a awm avangin thla ruk chhung tang turin a hrem.
Member pathum awmna tribunal, Justice Golam Mortuza Mozumder-a kaihhruai hian Nilaini khan Hasina-i awm lo mah se hremna tur hi a puang a. Hremna hi man a nih hun emaw, amah a inpek hun emaw atanga kalpui tan tur a nih thu Chief Prosecutor Muhammad Tajul Islam chuan thuthar lakhawmtute a hrilh.
August thlaa zirlaite kaihhruaina nasa taka a rorelna duh lohna lantir a nih hnua India-a tlanchhe zui ta, Hasina-i lakah hian thubuai hrang hrang siam a ni a. Tun hi heng thubuai siamsak zinga hremna a tawrh tur puan hmasak ber a ni.
Hasina-i rual hian Awami League hnuaia zirlai pawl awm phal tawh loh, Chhatra League-a an hruaitu langsar tak, Shakil Akand Bulbul-a pawh thla hnih tang tura hrem a ni bawk.
Court zah lo taka chea puhna hi Hasina-i aw record ni ngeia hriata a thu sawi darh atanga intan a ni a. He audio recording-ah hian prime minister hlui hian, “Ka lakah thubuai 227 siam a ni a, tunah chuan mi 227 thah phalna ka nei ta,” tia sawina aw a lang a. Sorkar forensic report chuan he tape-a aw hi Hasina-i ngei niin a finfiah a ni.
ICT hi kum 2010-a Hasina-i sorkarin kum 1971-a an ramin zalenna a sual laia indonaa dan pela chete hremtu tura an din kha a ni.
A sorkar paih thlak a nih hnua Nobel Peace Prize dawng tawh, Muhammad Yunus-a kaihhruai sorkar lailawk pawhin kalpui zelin Hasina-i rorel hun chhunga mihring dikna chanvo palzutna leh ei rukna awmte chhuiin an chungthu a ngaihtuah ta thin a ni.
Tribunal hian Hasina-i man theihna pathum a tichhuak tawh nghe nghe a, heng zingah hian nikuma amah duh lohna lantirna, a sorkar pawh a tluk phahna thlenga amah duh lova pungkhawm a hmachhawn dan rawng tak vang pawh a tel a. A kaihhruai Awami League party chu dan anga an awm phal loh a la ni reng a, an hruaitute chungthu ngaihtuah mek zel a ni.
Hasina-i thlawptute chuan thubuaite hi politics taka kalpui leh eptute hup behna tura tih mai mai niin an sawi a. Hetih lai hian sorkar lailawk chuan dan anga thil tih hi mipuiin dan rorelna an rinngam leh theihna tura tih ngei ngai niin an sawi ve thung.