Green Day pualin Walk of Fame-ah arsi an dah ta

Green Day pualin Walk of Fame-ah arsi an dah ta
Green Day puala Hollywood Walk of Fame-a arsi an dah chu Zirtawpni kalta khan a hawnna an nei ta a, MTV VJ Matt Pinfield chu emcee niin, ani hi kumin January thlaa a stroke hnua mipui hmuh tura a inlan leh vawi khatna a ni.
An puala arsi hawnnaah hian leather jacket dum an rawn inbel a, an drummer Tre Cool erawh suit leh tie nen a induang ve thung. Pinfield chu tiang hawl chungin stage-ah dingin, “Heng mipathum te nena vawiina helaia hun kan hmangho thei hi a va ropui em. An rimawi mai bakah anmahni pawh hi ka ngaina a ni,” tiin “Khawvela live band ropui berte zinga mi an ni,” a ti bawk.
Pinfield chuan Green Day lar chhuahna, 1994 classic ‘Dookie’ chu fakin, “|halai tam takin guitar, bass leh drums an tuipui phahna a nih bakah zai leh hlaphuah lama kal chaktirtu a ni. Kha kha rock ‘n’ roll, punk rock bul tanna chu a ni. Chu chu Green Day ti-special em em tu pakhat a ni a, vawiina heta kan chawimawina chhan pawh hi a ni,” a ti.
He ceremony-ah hian Green Day producer thin Rob Cavallo pawhin thu sawiin, 1993-a an demo ‘Longview’ a ngaihthlak hmasak ber chungchang sawi chhuakin, “Hei hi kan band ngaihthlak tawhah chuan a ropui berte zinga a mi,” a ti.
Deadpool actor Ryan Reynolds pawhin thu sawiin, fiamthuin, tunlai punk chawi lartu a inti a, Green Day chu an kutchhuak hmasa lam atanga la tuipui ngar ngartu a nih thu a sawi a, 1997 Green Day classic ‘Good Riddance (Time of Your Life)’ phei chu a sawi ngaihna awm lo khawpa a duhthu a sawi bawk.
He ceremony-ah chuan Green Day frontmah Billie Joe Armstrong pawhin thu sawiin, a chhungte chungah lawmthu a sawi a, a nu hming lam chhuakin, Walk of Fame chu a nuin a ngaih ropui zia a sawi chhuak a. An record lei sak thintu leh an show chhim thin fan-te chungah lawmthu a sawi bawk.